شستون ءَ چار نوک ورنائیں بلوچئے بے ساھیں جون آوار جنگ ءُ کُشگ ءَ پد آس ءَ مان دارگ بوتگ اَنت

رَسانک نیوز/ چارشمبے روچ ءَ 2 اردیبهشت ماہ 1405 ءَ، شستون ءَ چار نوک ورنائیں بلوچ پد چہ اشیا کہ سلاہ بندیں مردمان ءَ آوار جتگ ءُ کُشتگ اَنت آیانی بے ساھیں جون آس ءَ مان دارگ بوتگ اَنت۔ سر بوتگیں ھالانی رِد ءَ، جان ءَ برمش دئیوکیں ویلئے بُنگیج ءَ سلاہ بندیں مردمی ءُ آییئے ھم شئوریں ھمراھان ءَ اے ورنایاں آوار جتگ ءُ چیریں جاگهی برتگ اَنت ءُ آیانی سرا تیرگواری کرتگ ءُ کُشتگ۔ اے ویل گوں آیانی بے ساھیں جونئے آس ءَ مان دارگ ءَ آسر بوتگ.

اے چاریں نوک ورنایانی پجّار «پهد سامیراد» یوسپ ئے چُکّ، «ابدلرھمان بلوچزھی»، نسیر ئے چُک، «ارشد بلوچزھی» برکت ئے چُک ءُ «امیرھسین دھواری»، آکوب ءِ چُک، گوشگ بوتگ۔ سجّهیں کِساس 18 سالگ ءُ بُندر ءَ بم پشت ءِ نندوکیں مردم ءُ شستون ئے جھمنند بوتگ اَنت.

اے ھالئے رِد ءَ، چاریں ورنایان ءَ گوں یکّیا پہ مالی بُن گپّییے سرا جیڑہ اے بوتگ۔ جیڑہ ءَ پد آ مرد ءُ آییئے ھمراھان ءَ اے چاریں ورنا آوار جتگ ءُ چیریں جاگهی ءَ برگ ءَ پد تیرگواری کرتگ ءُ کُشتگ۔ کُشگ ءَ پد آیانی بے ساھیں جون آس ءَ مان دارگ بوتگ اَنت۔ اے ورنایانی بیگواہ بوھگ ءَ پد ھاندان ءُ لوگئے مردمان ءَ پہ آیانی شوھاز کنگ ءَ جُھد کرتگ تانکہ پنچشمبئے روچ ءَ آیانی بے ساھیں جون ماں شستون ئے کَشّ ءُ کِرّیں دمگاں دست کپتگ اَنت.