پنچشَمبِهئے ، 16 نومبر 2023
لومز زانشتجاهئےنۆدران په وتی لۆٹان زھرشانی کرتگ، پولیسا زھرشانیا نشتگێن نۆدربرانی سرا بێڑو برتگ و نۆدربر لٹ شاپ کرتگ اَنت و باز نۆدربر دزگیر کرتگ و برتگ.
اھوالکاریئے ردا زھرشانی کشت و کشاری بهرگئے نۆدربرانی نێمگا کنگ بوتگ و پدا آ دگه نۆدربران بازێن کچێا بهر زرتگ. پولیسا زھرشانیا نشتگێن نۆدربرانی سرا تیرگواری کرتگ و چمی گئیس جتگ اَنت. چه پولیسئے لٹ شاپ و گئیس جنگا رند گلشێر نامێن نۆدربرئے جاور نگێگ اَنت.
آ گوشگ اِنت که نۆدربرانی زھرشانی اے وھدا زانشتجاهئے مزنێن دروازگئے دپا برجاہ اِنت. جنکێن نۆدربران ھم بازێن کچێا بهر زرتگ و نشتگ اَنت.
زھرشانیا نشتگێن نۆدربران گوشگا اَنت تانکه مئے دزگیر بوتگێن ھمبل یل کنگ و درُستیگێن لۆٹ منّگ نبوتگ‌اَنت ما وتی زهرشانیا برجاه دارێن.
Be the first to comment