رَسانک نیوز/ مروچی پنچشمبے 22 مرداد ماہ 1405، بلوچی کہ 18 مرداد ماہ ءِ شپ ءَ وتی سیاد ئے ھوری ءَ دُزاپ ءِ جمهوری روڈ ءَ چہ سلاہ بندین ءُ پجّار نہ بوتگیں مردمانی تیرگواری ءَ ٹپّیگ بوتگ، چار روچ ءَ رَند چہ بازیں ٹپّان ءَ ساھی داتگ.
رَسانک ءَ اے بلوچئے پجّار «پرزاد شہبکش»، 41 سالگ، ابدلنبی ئے چُک، آروس کرتگ، سئے زھگئے پت، دزاپ ءِ نندوک زانتگ، کہ «مسئود شہبکش»، 31 سالگ، مهمد ئے چُک، دُزاپ ءِ کورین دمگئے نندوکئے ھمراھی ءَ تیرگواریئے دپ ءَ کپتگ.
رَسانک ءِ ھال سرکنوکانی رِد ءَ ساھت 18:45 ءِ وھدا، 18 مرداد ماہ ءَ جمهوری روڈ ئے پیادگیں مردمانی جاہ ءَ روگ ءَ بوتگ اَنت کہ سیاھیں پژو پارس گاڑیئے نندوکان ءَ آیانی سرا تیرگواری کرتگ. اے تیرگواری ءَ دویں بلوچ ءَ ماں لاپ ءُ پادا تیر وارتگ ءُ ٹپّیگ بوتگ اَنت.
داں انگت ءَ اُرش کنوکانی پجّار ءُ آیانی سئوب چہ اے تیرگواری ءَ زانگ نہ بوتگ.
Be the first to comment