رَسانک نیوز / چارشمبے 10 تیر ماہ 1405، دینی وانگجاہ ءَ وانوکیں بلوچی کہ ماں سرھس ئے چیریں ادارہ ءَ آییئے لوگئے سرا ماں سرھس ئے کوش سربزی دمگ ءَ اُرش ئے وھدا دزگیر کرتگ، پنچ روچ ءَ پد داں انگت ءَ بے ھالے سرپد ئے اِنت.
اے بلوچئے پجّار «مهمد رپی رودینی»، 26 سالگ، بئیت اللّہ ئے چُک، آروس کرتگ ءُ سرھس ئے کوش سربزی دمگئے نندوک زانگ بوتگ.
اے ھالئے رِد ءَ، چیریں ادارھئے ٹولییا 10 تیر ماہ ءِ سُهب ءَ مهمد رپی ئے لوگئے سرا اُرش ءُ پٹ ءُ لوٹ کرتگ ءُ آییئے دزگیر کنگ ءَ رَند گوں وت چیریں جاگهی بُرتگ. چیریں ادارھئے ٹولییا بید چہ سرکار ئے ھُکم ءُ کئسور ءُ مئیار ئے گوَشگ ءَ آییا دزگیر کرتگ ءُ گوں وت بُرتگ. لوگئے مردمان ءَ داں انگت ھچ پئیمیں ھالے سرپد ئے دست نہ کپتگ ءُ آیانی رَندگیری تاں اے وھدا بے نتیجگ بوتگ.
گوَشنت کہ مهمد رپی رودینی پیشترا ماں سال1401 ءَ مشهد ئے نزّیک ءَ شورک ملکی ئے دینی وانگجاہ ءَ وانگ ءَ بوتگ. پد چہ اشیا کہ آیی پئیسلہ کرتگ وتی وانگ ءَ ماں دُزاپ ءِ مکّی مسیت ءَ دیما ببارت، چیریں ادارہ ءَ چُنت بر ءَ آییا لوٹتگ ءُ زور کرتگ تانکہ چہ وتی پئیسلہ ءَ پد بہ کنزیت. گوں اشیا کہ آیی زور دئیگ بوتگ ماں دزاپ ئے دینی وانگجاہ ءَ موانیت بلے مهمد رپی ءَ وتی وانگ، دیما بُرتگ. سال 1402 ئے بُنگیجی دوران ءَ چیریں ادارہ ءَ آیی دزگیر کرتگ ءُ شش ماہ دارگ ءَ پد، آجو کرتگ.
مهمد رپی ءَ آجو بوھگ ءَ رَند چہ زھنی جنجال ءُ بندیگ بوھگئے وھدا داتگیں آزاراں پہ وتی وانگئے دیما بَرَگ ءَ سئوبین نہ بوتگ. داں انگت ءَ آییئے پدی رَندا دزگیر کنگئے سئوب ءُ آییئے سرا بستگیں بُهتان ئے بارئوا پکّائین ءُ اَلّمیں ھالی امنیتی ادارھان ءَ نہ داتگ.
Be the first to comment