جاشک ءَ امنیتی ٹولییا دو بلوچیں برات ئے دزگیر کنگ ءَ رَند یکّیا پہ بندراَبّاس ءَ شور داتگ ءُ آ دگہ بے ھالے سرپد ئے اِنت

رَسانک نیوز/ یکشمبے 31 ھُرداد ماہ 1405، جاشک ءِ چیریں ادارہ ءَ سُنّی دینی وانگجاہ ءَ وانوکیں بلوچیا لوٹ ءَ پد ھماں وھدا کہ وتی پیش کنگ ءَ اے ادارہ ءَ شُتگ، اُد ئے امنیتی ٹولییا آیی دزگیر کرتگ ءُ پہ بندراَبّاس ءَ شور داتگ.

اے بلوچئے پجّار «ھمزہ ترابی»، 25 سالگ، دادنبی ئے چُک، جاشک ءِ گابریک ءَ پرکوہ دمگئے نندوک زانگ بوتگ.

اسناد کانال ئے ھالئے رِد ءَ، جاشک ءِ چیریں ادارھئے ٹولی ءَ ھمزہ ءَ زنگ جتگ ءُ چہ آییا لوٹتگ کہ وت ءَ اے ادارہ ءَ سر بکنت، پد چہ اشیا آییا دزگیرش کرتگ۔ بلے ھمزہ ئے سرا بستگیں تُهمت داں انگت ءَ زانگ نہ بوتگ اَنت۔ دزگیر کنگ ءَ رَند آیی پہ بندراَبّاس ءَ شور دئیگ بوتگ.

گوشنت کہ نزّیک ماھی ءَ پیش ھمزہ ئے برات «تالب ترابی»، 30 سالگ، ھم پہ «سلاہ بندیں گلاں گوں ھور بوھگ» ئے الزاما دزگیر کنگ بوتگ۔ لوگئے مردمان ءَ اے تُهمت دروگ زانتگ. ماھی پد چہ تالب ئے دزگیر بوھگ ءَ گوں اشیا کہ آییئے سرا بستگیں تُهمت لوگئے مردمان ءَ گوَشگ بوتگ، بلے داں انگتا آییئے ھالے سرپد ئے دست نہ کپتگ، دویں براتانی ھالے سرپد ئے نہ بوھگ ءَ لوگئے مردمانی دل پریشانی گیش کرتگ.