رَسانک نیوز/ مروچی چارشمبے 3 تیر ماہ 1405، دینی وانگجاہ ءَ وانوکیں بلوچی کہ ماں تاریک 28 ھُرداد ماہ چہ سرھس ءَ پہ دُزاپ ءَ روگ ءَ بوتگ، تربت ھیدریہ ئے کامہ چیک پوسٹ ءَ چیریں ادارھئے ٹولییا آیی دزگیر کرتگ ءُ چیریں جاگهی بُرتگ۔ گوں اشیا کہ آییئے دزگیر بئیگ ءَ ھپتگی ءَ بُرز اِنت بلے داں انگت ءَ ھچ پئیمیں ھالے سرپد ئے چہ آییا دست نہ کپتگ.
اے بلوچئے پجّار ھاپز «الیاس کدارنجو (رودینی)»، 25 سالگ، آروس کرتگ، ھُدا مُرزی ابدلرشید ئے چُک، بُندر ءَ رزوی ھُراسان سوبہ ءَ سرھس ئے کوش سربزی دمگئے نندوک زانگ بوتگ.
اے ھالئے رِد ءَ، ھاپز الیاس چہ سرھس ءَ پہ دُزاپ ءُ مکّی مسیت ئے دینی وانگجاہ ءَ پدترّگ ءَ بوتگ، کہ چیریں ادارھئے ٹولی، آییا ماں تربت ھیدریہ ئے کامہ چیک پوسٹ ءَ دزگیر کرتگ.
ھال سرکنوکان ءَ گوَشتگ امنیتی ٹولی دینی وانگجاہ ءَ وانوکیں بلوچئے دزگیر کنگ ءَ پد، آییا چیریں جاگهی بُرتگ کہ داں انگتا آییئے بارئوا ھچ پئیمیں ھالی لوگئے مردمان ءَ دئیگ نہ بوتگ.
گوَشنت کہ چیریں ادارھئے ٹولییا لوگئے مردم زنگ جتگ ءُ گوَشتگ اَنت کہ آییئے دزگیر کنگئے سئوب «مکّی مسیت ئے دینی وانگجاہ ءَ وانگ» اِنت۔ بلے داں انگت ءَ آییئے سرا بستگیں تُهمت ءُ دارگئے جاگهئے بارئوا سرکاری ءُ اَلّمیں ھالی دست نہ کپتگ.
Be the first to comment