جاشک ءَ بلوچیں جهمنندے کہ دوازدہ روچ پیسرا بے پجّاریں مردمان ءَ آوار جتگ داں انگت ءَ بے ھالے سرپدئے اِنت

رَسانک نیوز/ شمبے 12 اردیبهشت ماہ 1405، جاشک ءَ بلوچیں جهمنںدے کہ ماں تاریک 1 اردیبهشت ماہ ءَ سلاہ بندین ءُ بے پجّاریں مردمان ءَ آیی چہ لوگئے دیما آوار جتگ ءُ چیریں جاگهی بُرتگ دوازدہ روچ ءَ پد داں انگت ءَ بے ھالے سرپدئے اِنت۔ گوں اشیا کہ لوگئے مردمان ءَ پہ آییئے شوھاز کنگ ءُ ھالے زانگ ءَ رَندگیری کرتگ ، بلے امنیتی ءُ انتزامی ادارھان ءَ آیاں ھچ پئیمیں پکّائیں ھال ءُ پسّویی نہ داتگ.

رَسانک ءَ اے بلوچیں جهمنندے پجّار «اُسمان ھوتی، 35 سالگ، اسهاک ئے چُک، بُندر ءَ جاشک ءِ لیردپ زِلّهئے ابد دمگئے نندوکیں مردمی زانتگ.

رَسانک ءِ ھال سرکنوکان ءَ گوشتگ: ھماں وھدا کہ اُسمان مگرب ئے نماز ماں مسیت ءَ وانتگ ءُ دیم پہ وتی لوگا روگ ءَ بوتگ کہ نگرہ رنگیں پژو 405 گاڑییے سلاہ بندین ءُ پجّار نہ بوتگیں مردمان ءَ آییئے سرا اُرش ءُ پہ زور وتی گاڑی ءَ تها کرتگ ءُ چیریں جاگهی برتگ.

ھال سرکنوکان ءَ گوشتگ: آییئے ھاندان ءُ لوگئے مردمان ءَ ماں اے در ءُ دوران ءَ پہ ھالے سرپدئے دست کپگ ءَ چہ امنیتی ءُ نزامی ادارھانی رھبندانی سرا روگ ءُ دمگئے با بهروسہ ایں مردمانی وسیلها باز رَندگیری کرتگ بلے داں انگت ءَ آیانی جُهد بے سوب بوتگ، اے گپّ ءَ ھاندانئے دل پریشانی گیش کرتگ۔ لوگئے مردمان ءَ چہ زمّهواریں ادارھان ءَ لوٹتگ کہ اے بارئوا گیشتر دلگوش ببنت.