رَسانک نیوز/ شمبے 12 اردیبهشت ماہ 1405 ءِ بانگواہ ءَ، سرباز ءِ انزا دمگ ءَ سلاہ بندین ءُ بے پجّاریں مردمان ءَ بلوچییے سرا اُرش کرتگ۔ اے اُرش شپ ئے ساھت 12 ءَ ھماں وھدا کنگ بوتگ کہ اے بلوچ چہ لوگا ڈنّ در آتکگ ءُ لوٹتگی وتی گاڑی ءَ سوار ببیت۔ اے اُرش ءَ بُرزا گوشگ بوتگیں مرد ئے گاڑی ءُ جاھا چُنت دگہ ٹِکّ پہ رگبار ءَ بندگ بوتگ اَنت.
رَسانک ءَ اے بلوچئے پجّار «مهمد سئید اربابی»، 21 سالگ، مهمد اکرم ئے چُک ءُ سرباز ءَ انزا دمگ ءِ نندوک زانتگ.
رَسانک ئے ھال سرکنوکانی رِد ءَ، مهمد سئید چہ سرباز ئے وانگ ءُ زانگ ادارہ ئے کارمندان اِنت۔ کہ اُرش ئے وھدا آییئے پژو پارس گاڑی ءَ کہ وتی لوگئے دیما داشت ءَ بوتگی چہ زوریں تیرگواری ءَ باز تاوانی بوتگ۔ ھمیں وڑا اے تیرگواری ءَ آییئے گاڑی، وتیگ ءُ سیادانی لوگ ءُ دکانان ءَ بازیں نُکسی بوتگ.
ھال سرکنوکان ءَ گوشتگ: پد چہ اشیا کہ دمگئے مردمان ءَ ھالیگیں پَشنگ پٹّ ءُ پول کرتگ اَنت اے گپّ درا بوتگ کہ تیرگواری ءَ وتاس ءُ سی تیری تُپنگ کارمرز کنگ بوتگ، گُمان اِنت کہ اے سلاہ دولتئے شنگ کرتگیں ببنت.
تیرگواری کنوکیں مردمانی پجّار ءُ آیانی سئوب کہ چُنت ھشاپ تیر ئے جنگ ءَ پد چہ جاھا در شُتگ اَنت داں انگت ءَ زانگ نہ بوتگ.
گوشگ لوٹیت کہ اے بلوچئے پت «مهمد اکرم اربابی»، کہ چہ دمگئے شونداریں مردماں بوتگ، پیشترا ماں تاریک 28 شهریور ماہ 1403 ءَ سرباز ءِ پُل ئے نزّیک ءَ سلاہ بندین ءُ بے پجّاریں مردمانی تیرگواری ئے دپ ءَ کپتگ ءُ کُشگ بوتگ.
Be the first to comment