رَسانک نیوز/ مروچی چارشمبے 9 اردیبھشت ماہ 1405، دُزاپ ءِ باکری روڈ ءَ پد چہ شیر آباد دمگئے ھڈّ ایردئیا سُهب ئے ساھت 8:30 ءِ وھدا چہ سلاہ بندیں مردمانی نزامی ٹولیئے سرا تیرگواری ءَ ٹپّیگ بوتگیں سئیں کارمندان ءَ یکّ دگہ کارمندیا ساہ داتگ۔ گوں اشیا کُشگ بوتگیں کارمندانی کچّ پہ دو کَس ءَ سر بوتگ.
پیشترا سیستان ءُ بلوچستان ئے پلیس ءِ ھال سرکنوکیں ادارہ ءَ گوشتگ چہ سلاہ بندیں مردمانی نزامی گشت ئے گاڑی ئے سرا تیرگواری ءَ یک نزامییے کُشگ ءُ سئے دگہ ٹپّیگ بوتگ.
کُشگ بوتگیں دوئیں نزامیانی پجّار استوار یک «مهمد رزا نزام دوست»، بُندر ءَ زھک ئے نندوکیں مردم ءُ ستوان یک «الی مومنی»، بُندر ءَ زابل ءُ انّیگیں وھدا دُزاپ ءِ جھمنند زانگ بوتگ۔ ٹپّیگ بوتگیں دوئیں نزامی کارمندانی پجّار داں انگت ءَ زانگ نہ بوتگ.
پیشترا رَسانک ئے ھال سرکنوکان ءَ گوشتگ دُزاپ ءَ چہ سلاہ بندیں مردمانی نزامی گاڑیانی سرا تیرگواری ءَ لهتیں کارمند کُشگ ءُ لهتیں دگہ ٹپّیگ بوتگ۔ اے ویل ءَ پد، امنیتی ءُ سادہ پوشیں ٹولیئے کارمندانی مزنیں کچّی ءَ شیر آباد دمگئے راہ بستگ اَنت.
ماں دگہ ھالی سرکاری میڈیا ءَ راسک ءَ سلاہ بندیں مردمانی سپاہ پاسدارانی گاڑیانی سرا تیرگواری ئے ھال شِنگ ءُ داواے کرتگ کہ اے اُرش ءَ جانی نُکس ءُ تاوان نہ بوتگ.
داں انگت ءَ ھچ تنزیم یانکہ گلی ءَ اے اُرشانی زمّهواری نہ منّتگ.
Be the first to comment