دُزاپ ءِ بندیگجاہ ءَ بلوچیں سیاسی بندیگی پاھو دئیگ بوتگ

رَسانک نیوز/ مروچی یکشمبے 6 اردیبھشت ماہ 1405، «آمر رامش»، بلوچیں سیاسی بندیگی کہ ماں تاریک 4 اردیبھشت ماہ ءَ پہ پاھو دئیگ ءَ دُزاپ ئے بندیگجاہ ءَ ایوکیں واڈ ءَ شور دئیگ بوتگ بید چہ اشیا کہ گوں لوگئے مردمان پہ گڑسریں دیدار ءَ بِلّنتی، مروچی بانگواہ ءَ پاھو دئیگ بوتگ۔ آیی کِساس 19 سالگ، الهیں بکش ئے چُک، بُندر ءَ چھبار ئے پیر سهراب زِلّھئے بلینگی دمگئے نندوک بوتگ.

«آمر رامش» ئے پرمندہ ماں انکلاب آمیدگِس ءَ ھماں وھدا دیما بَرَگ بوتگ کہ آیی کِساس شش ماہ ماں دارگ جاہ ءَ چہ دیدار ءُ لوگئے مردمانی ٹلپون کنگ ءَ منہ بوتگ۔ گوں اِشیا ماں ھمیں وھدا آئی ماں آمیدگِس ءَ پیش کنگ بوتگ۔ ھاندانئے ائولی دیدار گوں آییا ماں دُزاپ ءِ بندیگجاہ ءَ ھشت ماہ پد چہ دزگیر بوھگ ءَ بوتگ۔ پد چہ بُرّتگیں ھکمئے نہ منّگ ءَ، پرمندہ ھماں پہ مزنیں دیوان ءَ دیم دئیگ بوتگ کہ چار ماہ ءَ پد اُدا ھم نہ منّگئے گپّ رَد کنگ بوتگ.

گوشنت، ھمیں وھدا کہ ھاندان ءَ پہ آئی ءِ آجو کنگ ءَ رَندگیری کرتگ، چہ آیان ءَ لوٹ بوتگ کہ پہ «آمر» ئے آجو کنگ ءَ گوں امنیتی ادارہاں ھمکاری بکننت۔ ھتّا کہ ھاندان ءُ لوگئے مردمان ءَ سرکارئے ھلاپیں سئے مردمئے نام دئیگ ءُ چہ آیاں لوٹ بوتگ کہ اے سئیں مردمان ءَ بہ کُشنت یانکہ پہ آیانی کُشگ ءَ کاروایی بکننت۔ انّوں ھم گوں آمر ئے ایوکیں واڈ ءِ شور دئیگ ءَ ھاندانئے سرا زور دئیگ بوتگ کہ آییئے برات ءَ کہ یکّے چہ در مُلکی سرکارئے ھِلاپیں سیاسی جُھدکاراں زانگ بیت پہ امنیتی ادارھانی گون ءَ جُڑگ ءُ ھمکاری ءَ رازی بکننت، یانکہ وت ءَ امنیتی ادارھانی دست ءَبدنت۔ ڈنّ چہ اِشیا آمر پاھو دئیگ بیت.

پیشترا ماں تاریک 11 مهر ماہ 1403 ءَ امنیتی ءُ نزامی ٹولیئے بلینگی دمگ ءَ جَرّ ءُ داری دوایانی دکان ئے سرا اُرش ئے دپ ءَ کپتگ ءُ دزگیر بوتگ۔ گوں اِشیا کہ ائولسر امنیتی ٹولی ءَ لوگئے مردم گوشتگ اَنت آمر ماں اے ویل ءَ کُشگ بوتگ، بلے رَند چہ اشیا زانگ بوتگ کہ آمر زندگ ءُ امنیتی ٹولیئے دست ءَ اِنت۔ سرکاری میڈیایا ھم ماں تاریک 21 مهر ماہ 1403 ءَ چہ آیی ءَ زور ئے سرا منّینتگیں گپّانی ویڈیو رکاڈ شنگ کرتگ، چُش کہ ویڈیو ءَ جاہ آتکگ «آمر رامش» ئے چَپّیں چَمّ گژّتگ ءُ شونز بوتگ چہ اشیا درا بوتگ کہ دزگیر کنگئے وھدا امنیتی ٹولی ءَ آئی آزار داتگ ءُ لٹ ءُ شاپ کرتگ.

گوشگ لوٹیت کہ ماں چارشمبے روچ 11 مهر ماہ 1403 ءِ گُڑسریں پاس ءُ دمان ءَ امنیتی ٹولی ءَ گوں گرانیں سلاہ چُش کہ آر پی جی ءُ ھُمپارہ ئے کارمرز کنگ ءَ بلینگی دمگ ءَ جَرّ ءُ داری دوایانی دکانئے سرا اُرش کرتگ، کہ اے اُرش ءَ سئے مردم کُشگ بوتگ، کہ آیانی پجّار «مهمد ساھبزایی»، کِساس 31 سالگ، مهمد آکوب ئے چُک، راسک ئے نندوکیں مردم، «مهمدگل شاھوزھی (بلوچ)»، کِساس 25 سالگ، اھمد ئے چُک، بُندر ءَ سرباز ئے کیشکور ئے مردم ءُ راسک ئے جھمنند بوتگ، «شهاب جدگال»، کِساس 18 سالگ، ابدلواھد ئے چُک.