رَسانک نیوز/ دوشمبے روچ 24 پروردین ماہ 1405 ءَ، جالک ءَ دو نوک ورنائیں بلوچ کہ پہ وتی رمگئے چارینگ ءَ چہ بونسر دمگ ءَ کلگانی سیمسرا شتگ اَنت چہ سپاہ ئے پاسداران ئے تیرگواری ءَ، تیر وارتگ ءُ ساھش داتگ.
کُشگ بوتگیں اے دو نوک ورنائیں بلوچئے پجّار «الی سیاھانی»، کِساس 18 سالگ، نبروز ئے چُک، «امران سیاھانی»، کِساس 17، مهمدانور ئے چُک، ھر دو کلگانی سیمسرا بونسر دمگئے نندوک زانگ بوتگ اَنت.
اے ھالئے رِد ءَ، سہب ئے ساھت 7 ءِ نزّیک ءَ کلگانی سیمسر ئے نزّیکیں دمگی ءَ پہ وتی رمگئے چارینگا شتگ اَنت۔ سپاہ ئے ٹولی ءَ بید چہ پیسریں جار ءُ اُشتئے دلگوش بئیگ ءَ آیانی سرا تیرگواری کرتگ اے تیرگواری ءَ امران سیاھانی ءَ دو تیر ماں دل ءَ وارتگ ءُ جاہ ءَ ساھی داتگ۔ آئی ءِ ھمراہ الی سیاھانی ءَ ھم تیر وارتگ ءُ گوں ٹپّیگی ھالت ءَ جاہ ءَ یلاک دئیگ بوتگ.
اے دوئیں نوک ورنایانی سیادان ءَ گوشتگ: نزامی ٹولی ءَ امران ئے بے ساھیں جون، کلّگانی سیمسر ئے پاسگاہ ءَ سر کرتگ۔ بلے ویل ءَ پد داں نیمروچئے ساھت 12 ءَ، الی جاہ ءَ یلاک دئیگ بوتگ، لوگئے مردمان ءَ وھدی کہ آئی ءَ شوھازِش کرتگ انگت ءَ زندگ بوتگ۔ آیان الی ءَ نادراہجاہ ءِ سرکنگ ئے جُھد کرتگ بلے چہ ٹپّانی باز بئیگ ءَ الی ءَ ماں راہ ءَ ساہ داتگ.
داں انگت ءَ سپاہ ئے تیرگواری ئے پژدر ئے بارئوا گیشتریں ھالی دست نہ کپتگ.
Be the first to comment