مگس ءَ امنیتی باسک ءِ ٹولی ءَ بلوچی زبان ءُ دود ءُ رُبیدگ ءِ دو جُھدکار آوار جتگ

رَسانک نیوز ، چارشمبے 25 تیر ماہ 1404 ءَ ، مگس ءَ امنیتی باسک ءِ ٹولی ءَ بلوچی زبان ءُ بلوچی دود ءُ رُبیدگ ءِ دو جُھدکار آوار جتگ ءُ چیریں جاگہے برتگ.

اے دوئیں بلوچے جُھدکارے پجّار «سئید رئیسی ( رند )»، 27 سالگ، ھیدر ءِ چُک، مگس ءَ آشار دمگ ءِ نندوک ءُ «مھسن رئیسی ( رند )»، 29 سالگ، اُسمان ءِ چُک، آروس کرتگ ءُ دو زھگے پت، مگس ءَ ایراُکشان دمگ ءَ کولگ میتگے نندوک زانگ بوتگ اَنت.

رَسانک ءِ ھال سرکنوکان ءَ گوشتگ: سُھب ءِ ساھت ھپت ءَ، امنیتی باسک ءِ ٹولی گوں بازیں گاڑی ءَ پیسرا مھسن ءِ لوگے سرا اُرش کرتگ ءُ آئی ءَ آوار جتگ، پد چہ ایشی ءَ ساھت دو ءَ، امنیتی باسک ءَ آشار دمگ ءَ سئیدے دکان ءُ کارے جاہ ءَ اُرش کرتگ ءُ آئی ءَ آوار جتگ.

ھال سرکنوکان ءَ گوشتگ: مھسن ءُ سئید بلوچی زبان ءُ بلوچی دود ءُ رُبیدگ ءِ جُھدکار بوتگ اَنت ءُ چہ مزنیں وھدے ئا آیان ءَ پہ بلوچی زبان ءُ دود ءُ رُبیدگ ءِ دیمروی ءَ جُھد کرتگ.

داں اے ساھت ءَ ، بلوچی زبان ءُ دود ءُ رُبیدگ ءِ دوئیں بلوچے جُھدکارانی آوار جنگ ءِ پُژدر ءُ آیانی بندیگجاہ زانگ نہ بوتگ.

گوشگ لوٹیت: ایران ءِ سرکاری کانون ئے پانزدھمیں بہر ھمُک راج ءَ اے ھکّ داتگ کہ آیاں پارسی زبان ءِ وانگ ءُ زانگ ءَ ھور وتی ماتی زبان ءَ ھم بوان اَنت ءُ بزان اَنت بلے ایران ءَ، بلوچ، کُرد، ترک، ارَب ءُ ترکمن راج چہ وتی اے ھکّ ءَ بے بہر اَنت، اگاں آیاں پہ وتی زبان ءِ زندگ دارگ ءُ دیمروی ءَ جُھد بہ کن اَنت گڑا آیان ءَ گوں بیہار ءُ پادلپاش کنگ ءَ گُٹ گِر کن اَنت ءُ اے پیم ءَ آیانی جُھد ئے دیم ءَ دار اَنت.