رَسانک نیوز/ دوشمبے روچ 23 تیر ماہ 1404 ءَ، چھبار ءِ نوکآباد دمگ ءَ سئے شمبے روچ 17 تیر ماہ 1404 ءَ، امنیتی باسک ءُ سلاہ بندیں مردمانی ٹکّر ءُ تیرگواری ءَ دوئیں دیمے لہتیں مردم کُشگ ءُ ٹپیگ بوتگ۔ اے ٹکّر ءَ کُشگ بوتگیں یک دگہ سلاہ بندیں مردیئے پجّار زانگ بوتگ۔ سلاہ بندیں مردماں جیش الادل ءِ پدایی زانگ بوتگ اَنت.
اے جیش الادل ءِ پدایی ئے پجّار «جاوید جدگال (میرانی)»، 27 سالگ، ھُدابکش ءِ چُک، آروس کرتگ ءُ دو زھگ ءِ پت، بُندر ءَ سپرزھی دمگ ءِ مردمے ءُ انیگیں وھدا چھبار ءِ جھمنند زانگ بوتگ. دیمترا جیش الادل ءِ پدایی ئے پجّار «ابوالھسن اربابی (للہزھی)»، 28 سالگ، اسھاک ءِ چُک ءُ راسک ءِ پشامگ دمگ ءِ نندوک زانگ بوتگ.
گوشگ لوٹیت: سئے شمبے 17:30 بیگاہ ءَ، سپاہ ءِ چیریں ادارے ٹولی، پژو 405 گاڑئے پدا کپتگ، نوکآباد دمگ ءَ پژو 405 گاڑئے سلاہ بندیں نندوکان ءَ گوں سپاہ ئے ٹولی ءَ ٹکّر زورتگ ءُ دوئیں دیماں تیرگواری کرتگ۔ اے ٹکّر ءَ چہ دوئیں دیماں لہتیں مردم کشگ ءُ ٹپیگ بوتگ.
سپاہ ءِ ایردستیں مڈیائے اھبار ءَ اے بابت ءَ گوشتگ: چھبار ءَ امنیتی باسک ءُ سلاہ بندیں مردمانی ٹکّر ءَ شش تروریست ءُ دھشتگرد کُشگ ءُ دزگیر کنگ بوتگ اَنت.
گوشگ به بیت: جمے روچ 20 تیر ماہ ءَ، جیش الادل ءَ جار تاک شنگ کرتگ ءُ گوشتگ: چھبار ءِ نوکآباد دمگ ءَ آئی ءِ پدائیاں گوں امنیتی باسک ءَ ٹکّر زورتگ ءُ چار پدایی ندر بوتگ اَنت ءُ اے ٹکّر ءَ امنیتی باسک ءِ لہتیں کارمند ٹپیگ بوتگ.
Be the first to comment