دلگانا گۆن سلاهبندێن مردمانی تیرگواریان دو مردم کُشگ و ٹپّیگ بوتگ

رَسانک نیوز

جُمَهئے شپا ۲۰ مهر ۱۴۰۳، گۆن سلاهبندێن مردمانی تیرگواریان چُنت بلۆچ جهمنندئے نێمگا، کهنکئے هلکا چیرکنارئے دمگان چه دلگانئے شهرا یک مردمیا وتی ساه چه دستا داتگ و کم چه کم یک مردمے ٹپّیگ بوتگ.

کُشگ بوتگێن جهمنندئے پجّار (بهمن بامری)، ۲۵ سالگ، درمهمدئے چُکّ و دلگانئے شهرئے مردم و چه ٹپّیگ بوتگێن مردمئے پجارا تان انّون هچ هالے نێست.

گێشێن هالانی رِدا، سلاهبندێن مردمانی تیرگواریان، بهمن چه لاپئے نێمگا ٹپّیگ بوتگ و بازێن هۆنئے رچگا وتی ساهی چه دستا داتگ و دگه یک مردمے چه پادئے نێمگا ٹپّیگ بوتگ. لهتێن هبران چُش آتکگ که اے دوێن مردم ٹپّیگ بوتگ‌اَنت.

چه جنۆکانی جنَگئے سئوبا و آیانی پَجّارا تان انّون هچ هالے نێست بله هئیال چُش رئوت که اے تیرگواری زاتی جێڑهیئے واستا بوتگ.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.