رَسانک نیوز
چارشمبهئے شپا ۱۱ مهر ۱۴۰۳، یک بلۆچ جهمنندے سلاهبندێن مردمانی دستا پهره و بمپورئے راها کساس شهرک سنهتی نزّیکیا، تیرانی آماچ بوتگ و گۆن چُنت تیرئے لگّگا وتی ساهی چه دستا داتگ.
اے بلۆچ جهمنندئے پجّار (اَلی اکبر اپشار)، ۳۴ سالگ، نورمهمدئے چک و پهرهئے نندۆک گوَشگ بوتگ.
گێشێن هالانی رِدا، کساس شپئے ساهت هپتا، سئواری ماشینیئے نندۆکان پهره و بمپورئے راها کساس شهرک سنهتیئے نزّیکیا اَلی اکبرئے ماشینئے دێما شُتگ و آییش اۆشتارێنتگ و تیرانی آماچش کُرتگ و آییئے ماشینش گۆن وت بُرتگ و تتکگ‌اَنت.
چه جنۆکانی جنَگئے سئوب و آیانی پَجّارا تان انّون هچ هالے نێست.
گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.
Be the first to comment