میرجاوها نزامی نیروان ٹێلکشێن ماشینانی نێمگا تیرگواری کُرتگ

رَسانک نیوز

چارشمبهئے رۆچا ۲۱‏ شهریور ۱۴۰۳، نزامی نیروانی یکے چه میرجاوهئے راهان هالیگێن ٹێلکشانی ماشینانی نێمگا تیرگواری کُرتگ مالی نُکسئے سئوب بوتگ‌اَنت.

اے ٹێلکشا یک ویدئوے تها گوشتگ: کئیا گوَشتگ که ٹێلکشی آسان اِنت و مُپتێن نان دستا کارنت اے مئے ماشینئے ٹئێرانی هال اِنت که ما انشپی مرگئے دپا بوتگێن هُدا اے نیاما مئے بُنپان بوتگ سرکارئے نیروان میرجاوهئے جادها ایست بازرسیئے نزّیکا مئے نێمگا تیرگواری کُرتگ.

ٹێلکشی چه هما کاران هساب بیت که بازێنے چه بلۆچێن جهمنندان چه بلۆچستانئے جاه جاهان، مناسبێن و مُدامێن کارئے نێستیا، ٹێلکشیئے نێمگا شُتگ‌اَنت که برے گۆن لهتێن وئیلان چۆ گاڑیئے چپّ کنگ و امنیتی و نزامی نیروانی تیرشانیا دێم په دێم بنت و آیانی جانا تهدید کنت.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.