رَسانک نیوز/ سیےشمبه 19 آبان ماہ 1405، دزاپ ءِ چار راہ رسولی ءَ امنیتی ٹولییے دست ءَ بلوچییے دزگیر بوھگ ءَ 9 روچ گوستگ، بله داں انگت ءَ آییئے ھچ پئیمیں ھالے دست نه کپتگ ءُ لوگئے مردمانی رندگیری په ھالے سرپد ئے دست کپگ ءَ داں انگت ءَ بے نتیجگ بوتگ.
رَسانک ءَ اے بلوچئے پجّار «بهزاد ریگیجریزهی»، 36 سالگ، رزا ئے چُک، آروس کرتگ ءُ دو زھگئے پت زانتگ.
رَسانک ءِ ھال سرکنوکانی رِد ءَ، آیی یکشمبے روچ 10 آبان ماہ ءَ دزاپ ءِ چار راہ رسولی ءَ سادہ پوشیں امنیتی ٹولی ءَ که زاتی نمبر پلیٹیں گاڑی ءَ سوار بوتگ اَنت په زور ءُ ھژم ءَ دزگیر کرتگ ءُ چیریں جاگهی برتگ.
ھال سرکنوکان ءَ گوشتگ: امنیتی ٹولی ءَ بید چه کئسور ءُ مئیار ئے گوشگ ءَ اے بلوچ دزگیر کرتگ. بهزاد ئے لوگئے مردم رَند چه آییئے دزگیر بوھگ ءَ په ھالے سرپد ئے دست ءَ کپگ ءَ امنیتی ادارھاں چُش که چیریں ادارہ ءُ سپاھئے چیریں ادارہ ءَ شُتگ اَنت ءُ لوٹتگ چه آییئے ھالا سرپد ببنت، بله داں اے وھدا ھچ ادارھیا آیانی پسّو په الکاپ ءَ نه داتگ.
گوشگ لوٹیت که بهزاد ریگیجریزھی دزاپ ءِ چار راہ رسولی ءَ کؤش ئے دکان ئے واھُند اِنت ءُ ھمے وڑا امنیتی ٹولی ءَ چارشمبے 6 آبان ماہ ءَ آییئے برات زھت «شبیر ریگیجریزھی» ئے لوگئے سرا ماں کنرک ءَ اُرش کرتگ ءُ گپتگاِش. شبیر ھم داں انگت ءَ بے ھالے سرپد ئے اِنت.
بهزاد ئے دزگیر بوھگ ءَ ھشت روچ گوستگ ءُ آییئے بے ھالے سرپد ئے بوھگ، امنیتی ادارھانی پسّو نه دیئگ ءَ لوگئے مردمانی دلپریشانی گیش کرتگ. داں انگت ءَ ھچ پئیمیں ھالے اے بلوچئے جاور ئے بارئوا شِنگ نه بوتگ.
Be the first to comment