دزاپ ءُ لهشک ئے راه ءَ چه نزامی ٹولییے گاڑییے سرا تیرگواری ءَ سئے بلوچ کُشگ بوتگ

رَسانک نیوز/ مروچی چارشمبے 20 آبان ماہ 1405 ءِ بانگواہ ءَ، دزاپ ءِ ھرمک ءَ لهشک ئے دمگ ءَ نزامی ٹولییے پژو 405 گاڑییے سرا تیرگواری ءَ سئے مردم کُشگ بوتگ. نزامی ٹولییا پژو گاڑی ئے سرا بید چه جار ءُ دلگوش دیئگ ءَ تیرگواری کرتگ.

رَسانک ءَ اے سئے بلوچئے پجّار «امید جمالزھی»، 30 سالگ، کرم‌بیگ ئے چُک، دزاپ ءِ ھرمک ئے نندوک، «ھنزله جمالزھی»، 32 سالگ، ابراھیم ئے چُک، آروس کرتگ ءُ چار زھگئے پت، دزاپ ءِ نندوک ءُ «مبین گنگوزھی (ریگی)»، 34 سالگ، ھسین ئے چُک، آروس کرتگ ءُ زھگانی پت، میرجاوه ئے نندوک زانتگ.

رَسانک ءِ ھال سرکنوکانی رِد ءَ، اے سئے بلوچ چه تهران ءَ دیم په دزاپ ءَ پدترّگ ءَ بوتگ اَنت که بانگواه ءِ ساھت 3 ئے وھدا لهشک دمگ ءَ نزامی ٹولییا آیانی گاڑی ئے سرا تیرگواری کرتگ، گاڑی ءَ تیر لگّتگ ءُ اُوشتاتگ. آیاں که چمّ وت اے ویل ءَ دیستگ گوشتگِش: گاڑییے اُوشتگ ءَ رَند نزامیان ءَ ھنزله ءُ مبین ئے سرا ساه‌ گروکیں تیر جتگ ءُ چه جاھا دَر شُتگ اَنت.

ھال سرکنوکان ءَ گوشتگ: ویل ءَ رَند، دمگئے نندوکیں مردمان ءَ اورژانس پئون جتگ ءُ سئے‌‌ایں بلوچانی بے ساھیں جون گوں آمبولانس ءَ دزاپ ءِ کانونی ڈاکٹرانی جاہ ءَ سر کرتگ. اے وھدا آیانی ھاندان ءُ لوگئے مردم دزاپ ءِ کانونی ڈاکٹرانی جاہ ئے دیما مُچ اَنت.

نزامی ءُ امنیتی ٹولییے سئوب چه اے تیرگواری ءَ داں انگت ءَ زانگ نه بوتگ ءُ نه که سوبهئے امنیتی سروکان ءَ اے بارئوا وتی درشانی داتگ.