پهرہ ءَ سلاہ‌بندیں مردمانی تیرگواری ءَ دو بلوچ ٹپّیگ بوتگ

رَسانک نیوز/ یکشمبے روچ 17 آبان ماہ 1405، پهرہ ئے سجادشهر دمگ ءَ چه سلاہ‌بندیں مردمانی دو بلوچئے سرا تیرگواری ءَ آیاں تیر وارتگ ءُ سکّ ٹپّیگ بوتگ اَنت. اے ویل پیسر چه نیمروچ ءَ ساھت 11:30 ئے وھدا ٹیل ئے پمپ ئے دیما پیش آتکگ ءُ ٹپّیگ بوتگیں مردماں په درمان ءَ نادراہجاہ ءَ سرکنگ بوتگ اَنت.

رَسانک ءَ اے دو بلوچئے پجّار ءَ «مبین کمالی»، 23 سالگ، ائیدمهمد ئے چُک، «اُمر کمالی»، کِساس 35 سالگ، بلوچ ئے چُک، دوئیناں پهرہ ئے نندوک گوشتگ.

رَسانک ءِ ھال سرکنوکانی رِد ءَ، پیسر چه اے ویل ءَ اے بلوچان ءُ اُرش کنوکیں مردمانی میان ءَ دپ جنگی بوتگ ءُ چُنت دکیکت ءَ رَند سلاہ‌بندیں مردمان ءَ آیانی سرا تیرگواری کرتگ. اے تیرگواری ءَ «اُمر کمالی» ءَ ماں پاد ءُ «مبین کمالی» ءَ ماں کوپگ ءُ سینگ ءَ تیر وارتگ ءُ سکّ ءَ ٹپّیگ بوتگ اَنت. مبین کمالی ئے ھالت په اشیا که ماں گُٹّگ ءُ پوپ ءَ تیرے وارتگ نه گیگ گوشگ بوتگ.

رَسانک ءِ ھال سرکنوکانی رِد ءَ، ویل ءَ رَند ٹپّیگ بوتگیں مردمانی ھاندان ءُ وارساں امنیتی ءُ اِنساپ ادارھاں شُتگ اَنت ءُ وتی شکایست جما کرتگ. آیان ءَ چه سرکار ءَ لوٹتگ که تیرگواری کنوکانی ھِلاپ گامگیج بکنت.