سب ءُ سوران ءَ سلاہ‌بندین ءُ پَجّار نه بوتگیں مردمان ءَ دو بلوچیں برات آوار جتگ، سئے روچ اِنت که بے ھالے سرپد ئے اِنت

رَسانک نیوز/ مروچی 25 مهر ماه 1405، سب ءُ سوران ءَ نورآباد دمگئے «چاہ‌ سرگرد» ءَ گوں اشیا که سلاہ‌بندین ءُ پَجّار نه بوتگیں مردمانی دست ءَ دو بلوچیں براتانی آوار جنَگ ءَ سئے روچ گوستگ داں انگتا آیانی ھالے سرپد ئے دست نه کپتگ ءُ اے بُن گپّ ءَ لوگئے مردمانی دل پریشانی گیش کرتگ.

رَسانک ءَ اے دوئیں بلوچانی پجّار «سناءالله ملازھی»، 20 سالگ، «مهرالله ملازھی»، 17 سالگ، ھر دو امان الله ئے چُک، سب ءُ سوران ءَ «چاہ سرگرد» دمگئے نندوک زانتگ.

رَسانک ءِ ھال سرکنوکانی رِد ءَ، چارشمبے 22 مهرماہ ءَ بانگواه ءِ ساھت 2 ءَ سلاہ‌بندین ءُ پَجّار نه بوتگیں مردماں که دو گاڑی ءَ نندوک بوتگ اَنت چه دیوال ئے سرا لوگ ءَ تها بوتگ اَنت ءُ په زور ءُ بیهار ءَ اے دویں برات گوں وتا برتگ اَنت. چه آ وھدا بگر تانکه ھمے وھدا آیان ءَ ھچ پئیمیں ھالے سرپد ئے نیست اِنت که اے بُن گپّ ءَ لوگئے مردمانی ھاسکار آیانی مات ئے دل‌پریشانی گیش کرتگ.

ھال سرکنوکان ءَ گوَشتگ: اے دو برات سادگیں کارگر اَنت که سباہ ءَ چه لوگ ءَ په کارا رؤنت ءُ شپ ءَ لوگا پدتّر اَنت. آیان ءَ گوں کسیا زاتی دے گِرے نیست اِنت ءُ نه که جیڑھی است. لوگئے مردم چه اے کارواییے پژدر ءَ سهیگ نه بوتگ اَنت.

آیانی لوگ ئے مردمان ءَ چه آوار جنوکان ءَ لوٹتگ که گوں آیاں رابتا بکننت ءُ اگن دے گِرے یانکه جیڑھی است بسِند اَنتی.