«ھبیب‌الله کمبرزھی‌پرجاد»، کرمان ئے بندیگجاہ ءَ پاھو دیئگ بوتگ؛ پاھو دیئگ بوتگیں بلوچیں بندیگانی کچ دو بندیگ ءَ سربوتگ

رَسانک نیوز/ مروچی دوشمبے 20 مهر ماہ 1405 ءِ بانگواه ءَ، ھبیب الله کمبرزھی‌پرجاد، 38 سالگیں بلوچیں بندیگے که چه پیسرا په مواد ئے چِست ائیر کنگئے الزاما پاھو ئے ھُکمی وارتگ، آییئے ھکمئے سرا ماں کرمان ئے بندیگجاہ ءَ کاروایی بوتگ. مروچی اے زندان ءَ پاھو دیئگ بوتگیں بلوچیں بندیگانی کچ دو بندیگ ءَ سربوتگ.

رَسانک ءَ پیشترا ھبیب الله کمبرزھی‌پرجاد، الله داد ئے چُک، آروس کرتگ ءُ زھگانی پت، دزاپ ءِ نندوک ئے پجّار درا کرتگ. آییئے مات ءُ گُهار ءَ توار پُر کرتگ ءُ لوٹتگش که آییئے پاھو ئے ھکمئے دیم دارگ ببیت. ماے‌ساتو، ایران ئے انسانی ھکّانی چاروگ ءَ پیسرا په آییئے پاھو ئے ھُکمئے سرا کارواییا ماں انّیگیں روچان ءَ وتی دل‌پریشانی درشان کرتگ.

اے ھالئے رِد ءَ، یکشمبے 19 مهر ماہ ءِ شپ ءَ ھبیب الله ئے لوگ ئے مردمان ءَ گوں آییا گُڑسریں گِندوک کرتگ. کرمان بندیگجاھئے سروکان ءَ لوگئے مردم زنگ جتگ ءُ په گُڑسریں دیدار ءَ لوٹتگ.

ھبیب الله 1402 ءِ آبان ماہ ءَ، گوں اشیا که گاڑی ئے ڈریور بوتگ په مواد ئے چِست ائیر کنگئے بهتان ءَ دزگیر کنگ بوتگ ءُ پاھو ئے ھُکمی وارتگ. ھال سرکنوکان ءَ گوَشتگ: دست کپتگیں مواد آییئے نه بوتگ اَنت بله گوں اے جاور ءَ پدا ھم پاھو ئے ھُکم دیئگ بوتگ.

ھبیب الله ھاندان ئے ایوکیں مردیں چُک ءُ کٹّ ءُ کمایی کنوک بوتگ که آییئے پاھو دیئگ ءَ، ھاندان ءَ مالی جنجالانی دیمپان کنت. ھمے وڑا آ دگه بلوچیں بندیگئے پجار که مروچی ماں کرمان ئے بندیگجاہ ءَ پاھو دیئگ بوتگ «امین ھاجه ‌نزامی»، 33 سالگ، که آییئے پجّار رَسانک ءَ پیسرا گوشتگ.