شستون ءَ امنیتی ٹولییے تیرگواری ءَ بلوچیں چُکے کُشگ ءُ آییئے پت ٹپّیگ بوتگ

رَسانک نیوز/ پنچشمبے 2 مهر ماہ 1405 ءِ بانگواه ءَ، شستون ئے جهادآباد دمگئے شوشتری روڈ ءَ امنیتی ٹولی ءَ سایپا گاڑییے سرا که مئدنی آپ ءَ بار بوتگ تیرگواری کرتگ، اے تیرگواری ءَ یک چار سالگیں بلوچیں چُکیا ماں سرا تیر وارتگ ءُ ساہ داتگ، آییئے پت ءَ ھم تیر وارتگ ءُ سکّ ءَ ٹپّیگ بوتگ.

رَسانک ءَ اے چُکئے پجّار «مهمدامین دھکان»، 4 سالگ ءُ آییئے پت «اسهاک دھکان»، شستون ئے جهادآباد دمگئے نندوک زانتگ.

رَسانک ءَ پیشترا زی بانگواہ ءَ وتی شِنگ کرتگیں ھال ءَ گوشتگ: شستون ئے جهادآباد ءَ امنیتی ٹولی ءَ سایپا گاڑییے سرا که مئدنی آپ ءَ بار بوتگ تیرگواری کرتگ. ماں آ ھال ءَ گوشگ بوتگ ڈریور ءَ گُمان کرتگ ساده پوشین ءُ سلاہ بندیں مردم دُزّ اَنت ءُ لوٹنت گاڑی ءَ به دُزّ اَنت په ھمے ھاترا آیی نه اُوشتاتگ ءُ امنیتی ٹولی ءَ آییئے گاڑی ئے سرا تیرگواری کرتگ. ھماں وھدا بلوچییے تیر بوھگئے تسدیک نه بوتگیں ھال دست کپتگ.

رَسانک ءَ سربوتگیں سرجمیں ھالانی رِد ءَ، اے تیرگواری ءَ مهمدامین ءَ ماں سرا تیر وارتگ ءُ ساہ داتگ آییئے پت اسهاک ءَ ھم تیر وارتگ ءُ ٹپّیگ بوتگ. اسهاک ءَ ماں ٹپیگیں ھالت ءَ گوں اشیا که آییئے چُک سکّ ءَ ٹپّیگ بوتگ ءُ وتی ھالتی ھم نه گیگ بوتگ پدا ھم وتی چُک ءَ نادراہجاہ ءَ سرکنگ ئے جُهدے کرتگ. بله بالیگراب میدان ئے نزّیک ءَ آییئے گاڑی ءَ کار کنگ ءَ یله داتگ، گُڑسرا پت ءُ چُک گوں دگه گاڑی ءَ شستونئے رازی نادراہجاہ ءَ سرکنگ بوتگ اَنت.

مهمدامین دھکان ءَ رَند چه اشیا که رازی نادراہجاہ ءَ سرکنگ ءُ آییئے درمان بُنگیج بوتگ بله چه بازیں ٹپّان ءَ ساھی داتگ. اسهاک ھم په ٹپانی درمان ءَ نادراہجاہ ءَ بستری اِنت.