رَسانک نیوز/ دوشمبے 9 شهریور ماہ 1405، دُزاپ ءَ بلوچیں سُنّی دینی زانتکارے کہ چہ مکّی مسیتئے دیما سلاہ بندین ءُ پجّار نہ بوتگیں مردمان ءَ زور ئے سرا گاڑی ءَ سوار کرتگ ءُ آوار جَتَگ، رَند چہ پنچ روچ ءَ گوں دینی زانتکاراں، بابهروسهیں مردمان ءُ اسپیت ریشانی جهد ءَ آجو بوتگ.
رَسانک ءَ اے بلوچئے پجّار «انس اھمدزھی (ریگی)»، کِساس19 سالگ، اھمد ئے چُک، شستون ءِ ھوشّک دمگئے نندوک ءُ دزاپ ئے جهمنند زانتگ.
رَسانک ءِ ھال سرکنوکانی رِد ءَ، انس دینی جُهدکاران ءُ جمائت تبلیگ ءَ گوں جُڑتگیں مردمی بوتگ ءُ پہ چار ماہ تشکیل بوھگ ءَ مکّی مسیت ءَ بوتگ. 4 شهریور ماہ ءِ شپ ءَ ھماں وھدا کہ چہ مکّی مسیت ءَ در آتکگ، چُنت سلاہ بندین ءُ پجّار نہ بوتگیں مردمان ءَ توار ءُ زور ئے سرا گاڑی ءَ سوار ءُ چہ جاہ ءَ در کرتگ.
انس پنچ روچ ءَ رَند ھماں وھدا آجو بوتگ کہ انّیگیں ماھان ءَ سیستان ءُ بلوچستانئے بازیں دمگاں جهمنندانی آوار جَنَگئے ویل ءُ واک گیش بوتگ. اے بُن گپّ جهمنندانی یکی چہ مستریں دل پریشانیاں زانگ بیت.
Be the first to comment