رَسانک نیوز/ مروچی پنچشمبے 5 شهریور ماہ 1405 ءِ بانگواہ ءَ، دزاپ ءِ اردوگاہ دمگ ءَ سلاہ بندین ءُ پجّار نہ بوتگیں مردمانی تیرگواری ءَ بلوچیا تیر وارتگ ءُ چہ ٹپّانی باز بوھگ ءَ ساھی داتگ، یک دگہ بلوچے ھم تیر وارتگ ءُ سکّ ءَ ٹپّیگ بوتگ.
کُشگ بوتگیں بلوچئے پجّار «ابدلجلیل شہبکش»، 45 سالگ، ابدلمجید ئے چُک، سئے زھگئے پت، ٹپّیگ بوتگیں بلوچئے پجّار «مهمدرزا شاھوزھی»، 34 سالگ، کریم ئے چُک، ھر دو دُزاپ ءِ نندوک ءُ جهمنند زانگ بوتگ اَنت.
اے ھالئے رِد ءَ، ابدلجلیل دُزاپ ءِ اردوگاہ دمگئے جانبازان 6 ئے کُنڈ ءَ پلاستیک بہاء کنگئے دکان ءَ نگهپان بوتگ. ساھت 00:30 ئے وھدا ابدلجلیل ءُ دکانئے واھُند مهمدرزا شاھوزھی وتی کار ئے جاگهئے دیما اُوشتوک بوتگ اَنت کہ اسپیتیں پژو پارس گاڑییے گوں زاتی نمبر پلیٹ ءَ آیانی کِرّا اُوشتاتگ ءُ گاڑی ءَ نندوکیں مردمان ءَ اے دویں بلوچانی سرا تیرگواری کرتگ.
ھال سرکنوکان ءَ گوَشتگ: سلاہ بندیں مردمان ءَ ابدلجلیل ءُ مهمدرزا پہ رگبار ءَ بستگ ءُ گوں ھماں گاڑی ءَ چہ جاہ ءَ دَر شُتگ اَنت. تیرگواری ءَ رَند دمگئے مردمان ءَ گوں زاتی گاڑی ءَ ٹپّیگ بوتگیں مردمان ءَ دُزاپ ءِ تامین اجتمایی نادراہجاہ ءَ سر کرتگ.
ابدلجلیل ءَ بانگواہ ءِ ساھت چار ءَ چہ بازیں ٹپّاں ماں تامین اجتمایی نادراہجاہ ءَ ساہ داتگ. ھال سرکنوکان ءَ مهمدرزا شاھوزھی ئے ھالت ٹپّیگ گوَشتگ.
ابدلجلیل ئے ھاندانئے نزّیکیں ھال سرکنوکان ءَ گوَشتگ: پیش چہ اے ویل ءَ آییا گوں ھچ کس یانکہ گلی ءَ جیڑہ ءُ جنجالی نہ بوتگ. ھال سرکنوکان ءَ آیی آرام ءُ زھمت کَشّیں مردمی زانتگ، کہ شپ ءَ پہ نگهپانی ءَ وتی کار ئے سرا شُتگ ءُ داں سباھا ھمودا دلگوش بوتگ. آییئے پت ناجوڑ اِنت ءُ سمبالگ لوٹیت، لوگئے مالی ءُ مئاشی جنجالانی ٹاھینگ ابدلجلیل ئے زِمّها بوتگ.
Be the first to comment