رَسانک نیوز/ یکشمبے 1 شهریور ماہ1405 ءِ شپ ءَ، واش ئے نزّیک ءَ کلچات دمگ ءَ گوں ھمدپیں راہ ءَ دو بلوچ کہ زاتی گاڑی ءَ سوار ءُ وتی راہ ءَ روگ ءَ بوتگ اَنت سادہ پوشیں امنیتی ٹولییے تیرگواریئے دپ ءَ کپتگ اَنت، اے تیرگواری ءَ بلوچے ساہ داتگ ءُ آ دگہ سکّ ءَ ٹپّیگ بوتگ.
رَسانک ءَ کُشگ بوتگیں بلوچئے پجّار «رزا شہبکش»، ھُدا نزر ئے چُک ءُ ٹپّیگ بوتگیں بلوچئے پجّار «ابدلسمد شہبکش»، جانمهمد ئے چُک، ھر دو واشئے کلچات دمگئے نندوک زانتگ.
رَسانک ءِ ھال سرکنوکانی رِد ءَ، اے دویں بلوچ واشئے نزّیک ءَ گوں وتی زاتی گاڑی ءَ راہ ءَ روگ ءَ بوتگ اَنت کہ سادہ پوشیں امنیتی ٹولییا بید چہ پیسریگیں جار ءُ دلگوش دیئگ ءَ آیانی گاڑی پہ رگبار ءَ بستگ. اے تیرگواری ءَ گاڑی ءَ نندوکیں مردمان ءَ تیر وارتگ ءُ گاڑی چہ راہ ءَ ڈنّ بوتگ ءُ لیٹی وارتگ.
ھال سرکنوکان ءَ گوَشتگ: رزا شہبکش ءَ چہ بازیں ٹپّان ءَ ساہ داتگ ءُ ابدلسمد ھم سکّ ءَ ٹپّیگ ءُ پہ درمان ءَ نادراہجاہ ءَ سرکنگ بوتگ، کہ داں انگتا بستری اِنت ءُ آییئے درمان بوھگ اِنت.
Be the first to comment