جاشک ءَ سلاہ بندیں مردمییے تیرگواری ءَ ٹپّیگ بوتگیں بلوچ ءَ پد چہ دو روچ ٹپّانی درد ئے سگّگ ءَ ساھی داتگ

رَسانک نیوز/ پنچشمبے29 مرداد ماہ 1405، جاشک ءِ گزی دمگ ءَ بلوچی کہ ماں تاریک 27 مرداد ماہ ءِ شپ ءَ پد چہ سلاہ بندیں مردمیا گوں دپ جنگیا، تیرگواریئے دپ ءَ کپتگ ءُ ٹپّیگ بوتگ کہ پیسرا جاشکئے درمانجاھان ءَ سرکنگ بوتگ ءُ رَندا پہ بندراَبّاس ئے نادراہجاھی ءَ دیم دیئگ بوتگ کہ دو روچ ءَ رَند چہ بازیں ٹپّاں ساھی داتگ.

رَسانک ءَ اے بلوچئے پجّار «مهمدامین اھمدی‌منش (ساربانی)»، 21 سالگ، جاشکئے گزی دمگئے نندوک زانتگ.

رَسانک ءِ ھال سرکنوکانی رِد ءَ، مردی کہ مهمدامین ئے دپ ءَ لیچتگ داواھی کرتگ کہ آییا منی لوگئے دیما پہ سرئیت ءَ ڈریوری کرتگ ءُ دنز ءُ ھاکی بال داتگ. بلے مهمدامین ءَ اے گپّ نہ منّتگ ءُ رَد کرتگ. ھمے جنجال دوینانی میان ءَ سلاہ بندیں ٹکّر ئے سئوب بوتگ ءُ دیمیں مردما گوں سلاہ ءَ مهمدامین ئے سرا تیرگواری کرتگ.

ھال سرکنوکان ءَ گوشتگ مهمدامین پد چہ اشیا کہ بندراَبّاس ئے نادراہجاھی ءَ سرکنگ بوتگ دو روچ آییئے درمان برجاہ بوتگ بلہ چہ بازیں ٹپّاں ساھی داتگ. جنوکیں مرد تیرگواری کنگ ءَ رَند چہ جاھا در شُتگ ءُ پراری اِنت، کہ داں انگتا آییئے جاور ءُ چئیر بوھگئے جاگهئے بارئوا ھالی دست نہ کپتگ.

گوَشنت کہ مهمدامین ئے لوگئے مردم ءُ ھاندان چہ مالی لهاز ءَ ناچار ءُ تنگدستیں مردم اَنت، پہ اشیا کہ مهمدامین لوگئے مستریں بچک ءُ نگن آروک بوتگ آییئے مرک ءَ دمگئے مردم تورینتگ اَنت ءُ آیان ءَ وتی دل پریشانی درشان کرتگ اَنت.