سوران ءُ ھیدوچ ئے راہ ءَ چہ ٹیلکشّاں ٹاھینتگیں زورگری؛ گوں دلاّران ءُ نزامی کارندگانی ھمکاری ءَ چہ 150 تانکہ 300 ملیون تومن گِر اَنت

رَسانک نیوز/ جمے 26 تیر ماہ 1405، چہ سوران، ھیدوچ ءُ پسکوہ ئے راھانی کشّ ءُ کِرّیں دمگاں ھال سربوتگ کہ دلاّرانی ٹاھینتگیں زورگری چہ ٹیلکشّاں، گیشتر بوھگ اِنت۔ ھال سرکنوکانی رِد ءَ، دلاّران ءَ ماں دمگاں داشتگیں نزامی ٹولییا گوں ھمکاری استنت۔ اے ھالانی سرجمی ءَ، دلّار چہ ٹیلکشّاں پہ اشیا کہ گاڑی ئے دیم دارگ مبیت، آیانی ھلاپ پرمندہ جوڑ مبیت ءُ گاڑی ماں پارکینگ ءَ واپینگ مبیت چہ آیاں 150 تانکہ 300 ملیون تومن لوٹنت، لهتیں برا چہ اے زرّا گیش لوٹگ بیت۔ ھماں ڈریور کہ اے زرّ ءَ دات مکننت، گاڑییے دیم دارگ، بار ئے زپت بوھگ ءُ پرمندھانی دپ ءَ کپنت.

رَسانک ءِ ھال سرکنوکانی رِد ءَ، اے دلّار پژو، سورن ءُ یک تایلندی گاڑی ءَ کارمرز کننت ءُ ماں سوران، ھیدوچ ءُ پسکوھئے راہ ءُ دمگاں گشت جننت ءُ ٹیلکشّان ءَ پجّار کننت ءُ آیانی دیما دار اَنت۔ آیاں اے کارا گوں انتزامی ءُ کمک سرکنوکیں ٹولییانی موکل ءَ کننت۔ ھال سرکنوکان ءَ گوَشتگ اے کاروایی گیشتر نیم روچ یانکہ شپئے وھدا کنگ بنت ءُ لهتیں برا انتزامی ٹولی بید چہ دلگوش دیئگ ءَ ٹیلکشّانی دیما دار اَنت ءُ پہ اُوشتگ ءَ ناچار کننت.

ھال سرکنوکانی رِد ءَ، اگن ڈریوری لوٹتگیں زرّا مدنت آییئے ھِلاپ پرمندہ جوڑ کنگ بیت ءُ آییئے گاڑی ماں پارکینگ ءَ دارگ بیت۔ اے کاروایی گوں بار ئے ارزشتئے برابری ءَ جُرمانگ، پارکینگئے گِرانیں ھرج ءُ ھاندانئے کَٹّ ءُ درآمد ئے چہ دست ءَ دیئگ ءَ ھوار اِنت۔ چہ ھمیں سئوب ءَ لهتیں ڈریور ناچار بنت کہ وام بکننت ءُ اے زرّا بدیئنت.

رَسانکئے ھال سرکنوکان ءَ گوشتگ گوں اشیا کہ اے کار پد ماں پدا بوھگ اِنت، بلے پہ اشیئے دیم دارگ ءَ داں انگتا چہ چاروگیں ادارہ، پراجا ئے پٹ ءُ پول کنوکیں ادارہ ءُ چیریں ادارھئے ھِپازت ءَ ھچ پئیمیں گامگیجی زورگ نہ بوتگ۔ اے جاوراں بلوچیں ٹیلکشّانی مئاشی ءُ مالی جنجال گیش کرتگ.