واش ءَ کرمزھی کبیلهئے سروکانی، تیرگواری ویلئے جُرم داریں مردم ءَ امنیتی ادارھانی دست ءَ دئیگ ءِ شاباش کرزوکیں گامگیج/ کبیلهانی میان ءَ اَڑ ءُ جیڑ ئے گیش بوھگئے دیم داشتگ

رَسانک نیوز/ دوشی 19 تیر ماہ 1405، واشئے تیرگواریئے ویل ءَ کہ یک مردمی کُشگ ءُ آییئے ھمراہ ٹپّیگ بوتگ، ویل ءَ رَند کرمزھی کبیلهئے سروکیں مردمان ءَ پہ دمگئے ایمنی ئے برجاہ بوھگ ءُ گیشتریں جیڑھانی دیم دارگ ءَ گوں زمّهواریں گامگیجی ءَ اے ویلئے جرم داریں مردم ءَ انتزامی ءُ اِنساپ ئے ادارھانی دست ءَ داتگ۔ اے گامگیج کہ پہ دمگئے ایمنی ئے برجاہ بوھگ، گیشیں جیڑھانی دیم گِرَگ، کبیلهانی میان ءَ ٹکّر ئے دیم دارگ ءُ پہ کانون ئے سردستی ئے برجاہ دارگ ءَ زورگ بوتگ، گوں دمگئے نندوکیں مردمانی شاباش ءَ ھوار بوتگ.

سربوتگیں ھالانی رِد ءَ، ویل ءَ پد گوں کبیلهانی کماشیں مردمانی میانجی گری ءَ، کرمزھی کبیلهئے کماش ءُ سروکان ءَ گوں جرم دار ئے ھاندان ئے ھوری ءَ (ادنان کرمزھی) ءَ پہ کانونی بهرانی دیمروی ءَ واش ءِ جُست پُرس کنوکیں ادارھئے دست ءَ داتگ۔ جهمنندان ءَ اے گامگیج، شاباش گوَشتگ ءُ سماج ءَ زمّهواری، کانون ءَ شرپ دئیگ ءُ گیشیں جیڑھانی دیم دارگئے چیدگ زانتگ.

گوَشگ لوٹیت، دوشی 19 تیر ماہ ءِ ساھت 9 ءَ، واشئے مهمدآباد میدان ءَ پد چہ اشیا کہ چُنت ورنا ئے میان ءَ ٹکّر بوتگ، اے تیرگواری ئے ویل پیش آتکگ۔ تیرگواری ءَ «سجّاد ایرندگانی»، ھامد ئے چُک، واشئے ایرندگان زِلّهئے ھوشاپ دمگئے نندوک بوتگ، تیر وارتگ ءُ ھماں جاھا ساھی داتگ۔ آییئے ھمراہ کہ داں انگتا پجّاری زانگ نہ بوتگ ھم ماں پادا تیر وارتگ ءُ ٹپّیگ بوھگ ءَ رَند پہ درمان ءَ واشئے امام ھُمینی نادراہجاہ سرکنگ بوتگ.

رَسانک ءَ پیشتر ماں گزارشی اے ویل ءَ کُشگ ءُ ٹپّیگ بوتگیں دویں بلوچانی ھال شِنگ کرتگ۔ اے وھدا کرمزھی کبیلهئے کماشانی پہ دمگئے ایمنی ئے برجاہ دارگ ءَ ویلئے جرم داریں مردمئے امنیتی ادارھانی دست ءَ دئیگئے گامگیج گوں جهمنںدانی شاباش ءَ ھوار بوتگ.