واش ءُ پهرہ ئے راھا چہ مواد ئے دیم داروکیں ٹولییے تیرگواری ءَ کُشگ ءُ ٹپّیگ بوتگیں سئے بلوچئے پجّار زانگ بوتگ/ کُربان بوتگیں مردمانی کُهول امنیتی زمّهوارانی داوایا رَد کننت

رَسانک نیوز/ یکشمبے 7 تیر ماہ 1405، کُشگ، ٹپّیگ ءُ دزگیر بوتگیں سئے بلوچئے پجّار کہ ماں تاریک 9 اردیبهشت ماہ ءَ سیستان ءُ بلوچستان پلیس ئے ھال سرکنوکیں ادارہ ءَ داوا کرتگ کہ ماں پهرہ ئے ڈمّن زِلّهئے گچ برین دمگ ءَ چہ مواد ئے دیم داروکیں نزامی ٹولییے تیرگواری ءَ دو بلوچ کُشگ ءُ دو دگہ ٹپّیگ بوتگ، زانگ بوتگ.

ھال وشّ ءَ کُشگ بوتگیں بلوچانی پجّار «مُئین کرد»، 21 سالگ، ھمید رزا ئے چُک، لُنڈ ءُ واش ئے سنگان دمگئے نندوک ءُ «پرشید شهنوازی (میرگل زھی)»، 28 سالگ، آروس کرتگ ءُ یک زھگئے پت، واش ئے نندوک زانگ بوتگ۔ ٹپّیگ ءُ دزگیر بوتگیں بلوچئے پجّار «ھالد کرد»، 30 سالگ، داد رھمان ئے چُک، آروس کرتگ ءُ واش ئے نندوک زانگ بوتگ.

ھالئے رِد ءَ، اے سئے بلوچ پژو 405 گاڑی ء٘ سوار ءُ چہ واش ءَ دیم پہ پهرہ ءَ روگ ءَ بوتگ اَنت ءُ آیان ءَ ھچ سلاہ ءُ دگہ کاچاکی سامانی ھمراہ نہ بوتگ ءُ نہ آیان ءَ سلاہ بندیں ٹکّری گوں نزامیان ءَ زورتگ، بلے پدا ھم نزامی ٹولییا آیانی سرا تیرگواری کرتگ۔ پد چہ تیرگواری ءُ گاڑییے نندوکانی بے گناھی ئے درا بوھگ ءَ، نزامی ٹولی پہ اِشی کہ زمّهواری ءَ چہ وتی سرا بٹالینی اے پرمندہ ءُ پیلمی جوڑ کرتگ۔ ھاندان ئے مردماں زور داتگ کہ چہ آیانی گاڑی ءَ نہ کہ سِلاھی ءُ نہ کہ موادی دست کپتگ ءُ راستی آ وڑا کہ ماں سرکار ئے جارتاک ءَ گوَشگ بوتگ نہ اِنت.

پیشترا رَسانک ءَ چہ سوبہ ئے پلیس ئے ھال سرکنوکیں ادارھئے نیمگ ءَ گزارش کرتگ کہ امنیتی زمّهوارانی داوا اِنت کہ چہ اے مردمانی گاڑی ءَ یک سی تیری تُپنگی گوں دگہ بازیں ساز ءُ سامانی دست ءَ کپتگ ءُ زپت بوتگ۔ گوں اے جاوراں، کُرباں بوتگیں مردمانی کهول اے کِسّہ ءَ یکسر رَد کننت ءُ گوَشنت گاڑی ئے نندوک سئے مردم بوتگ اَنت ءُ نہ کہ چار، ھچ وڑیں سلاہ بندیں ٹکّری پیش نہ آتکگ ءُ نہ کہ گاڑی ءَ سِلاھی ماں بوتگ۔ آیان ءَ لوٹتگ اے پرمندہ بید چہ زوراں سری ءُ ڈلگچاری ءَ گوں اِنساپ ءَ دیما برو اَت۔ زمّهواران ءَ اے مردمانی کُشگ ئے پسّو دئیگ لوٹیت.