رَسانک نیوز/ چارشمبے 30 اردیبهشت ماہ 1405، شستون ءَ چیریں ادارھئے سادہ پوشیں ٹولی ءَ سواری گاڑییے سرا تیرگواری کرتگ، اے تیرگواری ءَ دو بلوچ کُشگ بوتگ۔ 7 ءِ ھُرداد ماہ ءَ یکی چہ کُشگ بوتگیں مردمانی برات، چیریں ادارھئے آیانی لوگئے سرا اُرش ءَ ماں مگس ئے کھن مگار دمگ ءَ دزگیر کنگ ءُ چیریں جاگھی بَرَگ بوتگ.
رَسانک ءَ یکی چہ کُشگ بوتگیں مردمانی پجّار «ابدلباست دھانی»، ءُ آییئے دزگیر کنگ بوتگیں برات «ابدلمالک دھانی»، کِساس 25 سالگ، ھر دو گل مهمد ئے چُک زانتگ۔ آ دگہ کُشگ بوتگیں بلوچئے پجّار کہ سجّهیں مگس ءِ کهن مگار ئے نندوکیں مردم اَنت، زانگ نہ بوتگ.
رَسانک ءِ ھال سرکنوکانی رِد ءَ، شستون ءَ تھا بئیگ ءِ چیک پوسٹ ءِ نزّیک ءَ چیریں ادارھئے ٹولی ءَ ابدلباست ءُ آییئے ھمراہ ئے گاڑی ئے سرا تیرگواری کرتگ کہ آیان ءَ تیر وارتگ ءُ ھماں دمان ءَ ساہ داتگ.
ھال سرکنوکان ءَ گوَشتگ، تیرگواری ءَ پد، چیریں ادارھئے ٹولی ءَ آیانی بے ساھیں جون چیریں جاگهی بُرتگ اَنت گوں اشیا کہ ھاندان ئے مردمان ءَ باز رَندگیری کرتگ ءُ ویل ءَ دہ روچ گوستگ بلے داں انگت ءَ ھچ زمّهواریا آیاں اَلّمیں پسّویی نہ داتگ ءُ آ ھماں وڑا دل پریشان اَنت.
ھمیں تَچکی ءَ، 7 ھُرداد ماہ ءِ روچ ءَ، مگس ئے چیریں ادارھئے ٹولی ابدلمالک، ابدلباست ءِ برات ئے لوگئے سرا اُرش ءُ بید چہ گناہ ءُ مئیار ئے گوَشگ ءَ دزگیر کرتگ.
ھال سرکنوکان ءَ گوَشتگ امنیتی ٹولہ آییئے دزگیر کنگ ءَ پد چیریں جاگهی بُرتگ ءُ لوگئے مردمان ءَ روژنیں پسّویی نہ داتگ.
گوَشگ لوٹیت لهتیں ھال سرکنوکان ءَ اے تیرگواری ءَ کُشگ بوتگیں مردمانی کچّ چار نَپَر زانتگ بلے داں اے وھدا آ دگہ دویں مردمانی کُشگ بئیگئے ھال رَسانک ءَ تسدیک نہ کرتگ.
Be the first to comment