کرمان ئے شهداد کویر ءَ، نزامی ٹولیئے تیرگواری ءَ سئے بلوچ کُشگ بوتگ

رَسانک نیوز/ پنچشمبے 10 اردیبهشت ماہ 1405، کرمان سوبهئے شهداد کویر ءَ نزامی ٹولی ءَ گاڑییے سرا کہ سئے بلوچ نندوک ءُ وتی راھا روگا بوتگ اَنت تیرگواری کرتگ۔ چہ نزامی ٹولیئے پدا کپگ ءُ تیرگواری ءَ آیان ءَ تیر وارتگ ءُ ساہ داتگ۔ ھال وشّ رَسانکدر ءَ اے بلوچانی پجّار «امید آلیزھی»، کِساس 23 سالگ، امان اللہ ئے چُک، «ناسر آلیزھی»، 25 سالگ، «اُسمان آلیزھی»، 15 سالگ، ھر دو ابداللہ ئے چُک ءُ سجّهیں دُزاپ ءِ نندوکیں مردم زانتگ اَنت.

اے ھالئے رِد ءَ، ھماں وھدا کہ اے بلوچاں گاڑی ءَ سوار ءُ وتی راھا روگ ءَ بوتگ اَنت نزامی ٹولی ءَ بید چہ پیسریگیں اوشت ءُ دلگوش دئیگ ءَ آیانی پدا کپتگ ءُ تیرگواری کرتگ، اے تیرگواری ءَ گاڑی ئے نندوکان ءَ سکّ ءَ تیر وارتگ ءُ جاھا ساہ داتگ.

چہ آ دگہ نیمگ ءَ، کرمان ئے انتزامی کمانڈر ءَ مدامی ئے وڑا کِسّها دگہ رنگی داتگ ءُ داوای کرتگ کہ اشاں چہ مواد ئے سئوداگرانی ٹولی ءَ بوتگ اَنت، کہ ماں کرمانئے شهداد کویر ءَ گوں پلیسئے رینجرز ءَ ٹکّر ئے وھدا کُشگ بوتگ اَنت ءُ چہ آیاں سلاہ ءُ یک تن ءَ بُرز مواد دست کپتگ، اے مردمان ءَ سلاہ بندیں ناشرکار گوشگ بوتگ۔ ھال سرپدیں مردمان ءَ سرکار، آییئے میڈیا ءُ کرمانئے انتزامی کمانڈر ئے گپ رَد کرتگ اَنت ءُ اے ھبر ئے سرا زور داتگ کہ پلیس ءَ بید چہ پیسریگیں جار ءُ دلگوش دئیگ ءَ آیانی سرا تیرگواری کرتگ.

اے ویل ءَ اُسمان آلیزھی ئے کُشگ بئیگ گوں 15 سال اُمر ءَ، چہ دومی نیمگ ءَ سرکاری میڈیا ئے داوا کہ آیاں مواد ئے سئوداگر ءُ سلاہ بندیں ناشرکار بوتگ اَنت ھماں وھدا اے گپّ دیما آتکگ کہ چہ اِدا پیش ھم پلیس ءَ پہ وتی ناشرکاریانی چیر دئیگ ءُ وت ءَ بے مئیار کنگ ءَ اے پیمیں گپ ءُ کِسّہ جوڑ کرتگ.