شستون ءَ، نزامی ٹولییے پُرّیگیں لوگییے سرا اُرش ءَ دو ھُردیں چُکّئے ھوری ءَ یکّیں ھاندانئے چار مردم دزگیر کنگ بوتگ

رَسانک نیوز/ چارشمبے 9 اردیبهشت ماہ 1405 ءِ سُهب ساھت 5 ئے وھدا، شستون ءَ نزامی ءُ امنیتی ٹولی ءَ گوں پنچ زاتی ءُ سرکاری گاڑیا بلوچییے لوگئے سرا اُرش کرتگ ءُ بید چہ کسور ءُ مئیار ئے گوشگا آییا گوں لوگی ءُ دو کسانیں چُکّ ءَ ھور دزگیر کرتگ ءُ چیریں جاگهی برتگ.

اے بلوچئے پجّار «مدسرالی ارباب»، کِساس 30 سالگ، شاھجان ئے چُک، شستون ئے نندوکیں مردمی زانگ بوتگ۔ آییئے لوگی ءُ دویں ھُردیں چکّانی پجّار داں اے وھدا زانگ نہ بوتگ.

اے ھالئے رِد ءَ، امنیتی ٹولی ءَ بید چہ سرکار ئے ھُکم ءُ آیانی کسور ءُ مئیار ئے گوشگا، لوگا تها بوتگ اَنت ءُ گوں زور ءُ تُرندیا اے بلوچ ءَ گوں لوگی ءُ دو ھُردیں چُک ءَ دزگیر ءُ چیریں جاگهی برتگ۔ ھماں روچ ءَ سباھئے ساھت دھا گوں ھاندان ءُ لوگئے مردمانی رَندگیری ءَ دویں کسانیں چُک آیانی دست ءَ دئیگ بوتگ اَنت۔ بلے مُدسّر الی ارباب ءُ آییئے لوگی داں انگت ءَ چیریں جاگهی ءَ دارگ بوتگ اَنت.

تاں انگت اے جوڑیئے دارگئے جاگہ، آیانی مئیار ءُ کسور ئے بارئوا الّمیں ھالی دست نہ کپتگ.