چھبار ءَ بلوچے چُکّی دو روچ پد چہ آئی ءِ بیگواھی ئے ھالئے شنگ بوھگ ءَ، ھولناکیں وڑی ءَ کُشگ بوتگ / بے ساھیں جون چہ شهر ئے کشّ ءُ کِرّ آں دست کپتگ

رَسانک نیوز / شمبے 22 آزر ماہ 1404 ءِ شپ ءَ، بلوچے چُکّی ئے بے ساھیں جون کہ پنچ شمبے روچ 20 آزر ماہ ءَ چہ چھبار ءَ بیگواہ بوتگ ءُ لوگئے مردمان ءَ پہ آئی ءِ شوہاز کنگ ءَ چہ مهلوک ءَ کمک لوٹتگ پد چہ ایشی ءَ کہ ھولناکی ئے سرا کُشگ بوتگ، مردمانے دست ءَ کپتگ.

رَسانک ءَ اے بلوچے چُکّئے پجّار «مهمد ھالکی»، 13 سالگ، دُرمهمد ئے چُک، بُندر ءَ گہ ءَ مُتسنگ دمگئے نندوکیں مردم ءُ انّیگیں وھدا چھبار ئے جھمنند زانتگ.

رَسانک ءِ ھال سرکنوکانے رِد ءَ، پد چہ ایشی ءَ کہ مردمان ءَ پہ اے چُکّئے شوہاز ءَ ھشر کرتگ، آئی ءِ بے ساھیں جون گوں جُہلیں ٹپّ، پٹرول ئے سوچک ءُ بُرّتگیں چمّ ءُ گردن ءُ لاپ ءَ دست کپتگ.

گؤشگ لوٹیت: اے چُکّئے بے ساھیں جونئے دست کپگ ءِ چُنت ساھت ءَ پد اے سرھال ءَ سجهیں بلوچستان ئے مردم دل پریشاں کرتگ. چھبار ءَ ھر جاگہ ءُ روڈ ءَ ایمنی ئے دور گِند جَتگ ءُ چھبار ئے انتزامی کمانڈر «مهمد اَلی لکزایی» ئے اے چُکّ ئے بیگواہ بوھگئے باروا گوشتانک ءَ پد ھم ھچ وڑیں سوب مندیں کاروایی یے بُنگیج نہ بوتگ.

دیمترا رَسانک ئے ھال سرکنوکان ءَ گؤشتگ: ویلئے روچ ءَ بیگاہ ئے ساھت شش ءَ مهمد پہ نان ئے زورگ ءَ چہ لوگ ءَ ڈنّ شُتگ ءُ پدا واتر نہ بوتگ‌. آئی ءِ ھاندان ءَ گؤشتگ: گوں مهمد ئے موبایل ئے لوگ ءَ پَشت کپگ ءَ آیان ءَ چہ مهمد ئے راہ ءُ جاگہ ءَ ھچ نشانگی نہ بوتگ.

اے بلوچے چُکّئے ھاندان ءَ گؤشتگ: آیان ءَ گوں کسّ ءَ جیڑہ ءُ جنجالے نہ بوتگ. اے ڈوھ ئے کنوکیں مردمانے پجّار ءُ سوب داں انگت ءَ زانگ نہ بوتگ.