کُنٹانی ھور ءِ نزّیک ءَ مرساد ٹولی ءَ بلوچے ٹیلکشّ آنے کار ئے جاہ ءَ اُرش کرتگ

رَسانک نیوز/ 16 آزر ماہ 1404 ءَ، مرساد ئے نزامی ٹولی ءَ کُنٹانی ھور ءَ، سیمسرانی نزّیک ءَ بلوچے ٹیلکشّ آنے کار ئے جاہ ءَ اُرش ءَ گوں، ٹیلکشّ آنے کار ئے دیم داشتگ ءُ آیاں سکّ ءَ دل سیاہ کرتگ۔ اے اُرش ءَ نزامی ٹولی ءَ ھماں کہ گوں پٹ پٹی ءَ اے کارش کرتگ، دیمش گپتگ ءُ پریشان کرتگ۔ اے پیم ءَ ٹیلکشّ آنے کار ءُ زندمان گوں گیشتریں اَڑچنایی ءَ دُچار بوتگ.

رَسانک ءِ ھال سرکنوکانے رِد ءَ، نزامی ٹولی ھر چُنت وھدا پد، اے جاگہ ءِ سرا اُرش کنت ءُ ٹیلکشّ آنے کار ئے دیم ءَ پہ وتی جول ءُ رشوت ءَ داریت۔ نزامی آنی اے وڑیں پیش اَتک ٹیلکشّ آنے ھر روچیں زندمان ءُ کار پِٹّینتگ ءُ دمگئے نندوکیں مردمانے مالی نُکس ءُ جنجال گیش کُتگ.

ھال سرکنوکاں گؤشنت: بازیں ٹیلکشّی، تنگ دستی ءُ ناچاریں مردم اَنت۔ اگاں آیاں مالی جوازا بوتگ اَت گُڑا پٹ پٹی ئے جاہ ءَ پہ وت ءَ کایک ءُ گاڑی یے گپتگ۔ لہتیں چہ ٹیلکشّ آں ھمیں پٹ پٹی ءَ ھم پہ وام ءُ بدل ءَ زورتگ. الکاپیں کار ئے نہ بوھگ ءَ چہ ناچاری ءَ ٹیلئے کَشّگ ءَ دیمش کرتگ.

نزامی ٹولی ئے پیش اَتک درا کنت کہ واک ءُ زور، نزامی پوشاک بے وسیں مهلوکئے سرا پہ جول ءُ باج ءِ گِرَگ ءَ ردی ءَ کارمرز بنت۔ اے ناشر کاریانے زور ءُ گرانی گیشتر ٹیلکشّ آنے کوپگ ءَ کپیت، ھماں ٹیلکشّ کہ چہ دیمترا ڈلگچاری، بیکاری ءُ مالی جنجال آں دیمپان اَنت.