رَسانک نیوز / زی جمه 7 آزر ماہ 1404 ءَ، آھوران ئے دمگ ءَ برھانزھی ءُ پولادی کبیلہ آنے میان ءَ گوں ھاجی کادر بکش ئے میانجی گری ءَ سلاھکاری ءُ رازی نامہ بوتگ. دوئیں کبیلہ آنے مردمان ءَ پیسریگیں اَڑ ءُ جیڑ شموشتگ اَنت.
رَسانک ئے ھال سرکنوکانے رِد ءَ، اے دیوان ءَ کہ دمگئے کماش ءُ اسپیت ریشیں مردمان ءَ بہر زورتگ، دوئیں نیمگ ئے مردمان ءَ ویلی یے سرا کہ آیانی میان ءَ چُنت سال دیمترا پیش اَتکگ ءُ چہ نازانتی ءَ مردمی جنگ بوتگ گپّ ءُ تراں کرتگ. اے جیڑہ آنے ھرابیں نتیجہ آنے سرا گَور ءُ پِگر ءَ گوں، رازی نامہ ءُ سلاھ ئے پئیسلہ کرتگ.
ھال سرکنوکان ءَ گوشتگ: ھاندان آن ءَ وتی ھبراں درشان کنگ ءَ پد، یکّا دگرا بگل کشّ کرتگ ءُ بَکش داتگ. دوئیں کبیلہ آنے مردمان ءَ پہ گوستگین ءُ دیریگیں جیڑہ آنے ھلاس کنگ ءَ زور داتگ. دوئیں نیمگ آن ءَ اھد کرتگ کہ آؤکیں روچاں چہ اَڑ ءُ جیڑہ ءَ پهریز کننت ءُ چہ جنجال آں دور بنت، اے پیم دیوان آسر بوتگ.
Be the first to comment