جازموریان ءَ گوں کماش ءُ اسپیت ریشیں مردمانے جُھد ءَ سئیپ الی ءُ پرامرزی کبیلہ آنے میان ءَ چُنت سال ءَ پد، اَڑ ءُ جیڑ آسر بوتگ اَنت

رَسانک نیوز/ مروچی سئےشمبے 20 آبان ماہ 1404 ءَ، جازموریان ءَ گوں مزنیں، با بہروسہ این ءُ اسپیت ریشیں مردمانی جُھد ءَ سئیپ الی ءُ پرامرزی کبیلہ آنے لہتیں ھاندان آنے میان ءَ چُنت سال ءَ پد، اَڑ ءُ جیڑ پہ دوستی ءُ وشّانی ءَ بدل بوتگ اَنت.

اے مزنیں مراگش ءَ کبیلہ آنے سروک، دینی زانتکار، ورنایان ءُ دمگ ءِ نندوکیں مردمان ءَ بہر زورتگ۔ اے دیوان گوں یکوئی ماھول ءَ برجم دارگ بوتگ ءُ دوئیں نیمگ ئے مردمان ءَ پاکیں کُرآن ئے کسم وارتگ کہ کُہنیں جیڑہ ءُ جنجال آں شموشنت ءُ گوں براتی ءُ دو نیمگیں اِزّت، شرپ دارگ ءُ ھوری ءَ زندمان آسر کننت.

اے کاروایی، بلوچانے اکلمندی ءُ آیانی جُھد ءَ پہ جیڑہ آنے سندگ ءَ گوں وت پہ وتی وڑا درا کنت۔ سلاھ ءُ تپاکی شرتریں راہ پہ بلوچستان ءِ دمگ آنے آرام کنگ ءُ سماج ءِ یکوئی ءَ زانگ بیت.