سوبے اسپہان ءَ، نزامی ٹولی ئے تیرگواری ءَ سئے بلوچ کُشگ، ٹپیگ ءُ دزگیر بوتگ

رَسانک نیوز/ یکشمبے روچ ءَ 23 شہریور ماہ 1404 ءَ، اسپہانے ھم دپیں راھے ءَ نزامی ٹولی آنے پژو پارس گاڑی ئے سرا تَچکیں تیرگواری ءَ سئے بلوچ کُشگ، ٹپیگ ءُ دزگیر بوتگ۔ نزامی ٹولی ٹپیگ بوتگیں بلوچ ءُ آئی ءِ رکّ اِتگیں ھمراہ ءَ دزگیر کرتگ ءُ چیریں جاگہے برتگ.

کُشگ بوتگیں بلوچے پجّار «ناسر نوتیزھی»، گلام ئے چُک، ٹپیگ بوتگیں بلوچے پجّار «مبین شہ‌بکش»، نور مھمد ئے چُک گوشگ بوتگ، آیانی ھمراہ ءُ مبین ءَ گوں ھور دزگیر بوتگیں بلوچے پجّار داں انگت ءَ زانگ نہ بوتگ.

رَسانک ءِ ھال سرکنوکانے رِد ءَ، اے بلوچاں پژو پارس گاڑی ئے نندوک بوتگ اَنت ءُ نزامی ٹولی آیانی پدا کپتگ، اے سِٹ ءُ کَپّ ءَ آیانی گاڑی گوں روڈ ئے گارڈل ءَ لگ اِتگ۔ نزامی ٹولی ءَ بے پیسرگیں جار ءُ توار ءَ آیانی سرا تیرگواری کرتگ۔ اے تیرگواری ءَ بلوچے کُشگ، یکی دگہ ٹپیگ بوتگ ءُ رکّ اِتگیں ھمراہ ءِ ھوری ءَ دزگیر کنگ بوتگ.

اے درگت ءَ سوبے اسپہانے کور کمانڈر ے جانشیں سرہنگ «ھُسین بساتی» ءَ گوشتگ: نزامی ٹولی ءُ سلاہ بندیں مواد پَروشانے میان ءَ ٹکّر ءُ تیرگواری ءَ مواد پَروشے کُشگ ءُ آئی ءِ ھمراہ دزگیر بوتگ۔ آئی ءَ گوشتگ: اے ٹکّر ءَ 150 کیلو تریاک، ھیروئین ءُ شیشہ دس کپتگ ءُ گرمیں سلاہ ھم زپت کنگ بوتگ.