راسک و دشتیاریئے راها یک بلۆچ ٹێلکشے گۆن ماشینئے چپّ کنگا بێران بوتگ

رَسانک نیوز

چارشمبهئے رۆچا ۱۸ مهر ۱۴۰۳، یک ماشینے راسک و دشتیاریئے راه چپّ بوتگ و سئوب بوتگ که یک ٹێلکشے که مُدام هارانی وهدا مردمانی دستی گپتگ بوتگ‌اَنت بێران ببیت.

اے ٹێلکشئے پجّار (مراد بلۆچ)، هئیبتانئے چُکّ و هدارئے نندۆک چه راسکئے دمگان گوشگ بوتگ.

گێشێن هالانی رِدا، کساس زُهرئے ساهت پنچا، مرادئے ماشین نۆبندیانئے دمگان چپّ بوتگ و مراد گۆن بازێن ٹپّانے که آییئے جانا بوتگ‌اَنت وتی ساهی چه دستا داتگ.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.