رَسانک نیوز

چارشمبهئے رۆچا ۲۸ شهریور ۱۴۰۳، یک بلۆچ جهمنندے سلاهبندێن مردمانی تیرگواریان سرباز و راسکئے راها و کساس سپاهئے پایگاهئے یک کیلومتریا گۆن چُنت تیرئے لگّگا کُشگ بوتگ.

اَے بلۆچ جهمنندئے پجّار (اکرم اربابی)، کساس ۴۰ سالگ، اَزیمئے چُکّ و گۆردرئے هلکئے مردم چه سربازئے دمگان گوَشگ بوتگ.

گێشێن هالانی رِدا، سلاهبندێن مردمان کساس بندانئے سرد هانئیا سرباز و راسکئے راها اکرمئے ماشینئے نێمگا تیرگواری کُرتگ که گۆن ماشینئے تیرئے ورگا ماشین چه راها درآتکگ و چپّ بوتگ.

چه جنۆکانی جنگئے سئوبا و آیانی پَجّارا تان انّون هچ هالے نێست بله گوَشگ بیت که اے اُرُش سپاهئے پایگاهئے یک کیلومتریا و سربازئے نیرو انتزامیئے پاسگاهئے دو کیلومتریا بوتگ.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.