رَسانک نیوز

شَمبِهئے رۆچا ۱۷ شهریور ۱۴۰۳، یک بلۆچێن جهمنندے کوچینکئے هلکا چه گِهئے دمگان گۆن یکیئے چانکوئے جنَگا وتی ساهی چه دستا داتگ.

بێران بوتگێن بلۆچئے پجّار (اَبدُلّاه سابکزهی)، ۱۷ سالگ، میرێنئے چُکّ و کوچینکئے هلکئے مردم چه گهئے دمگان گوشگ بوتگ.

گێشێن هالانی رِدا، اے نۆک ورنا کساس شپئے ساهت نُها یک دُکّانیا وتی هلکا گۆن دگه یک کسا هبر هبر و درگیر بوتگ‌اَنت که چانکویی وارتگ و چه دلئے نێمگا ٹپّیگ بوتگ که گهئے نادراهجاهئے برگئے راها گۆن سکّێن ٹپّان وتی ساهی چه دستا داتگ.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.