شستونئے سیمسرا کم چه کم هپت ٹێلکشێن بلۆچ سِلاهبندێن ٹێکانی (سارقین) تیرگواریئے سئوبا بێران کنگ بوتگ

رَسانک نیوز

پنچشَمبِهئے بانگواهئے رۆچا ۷ دی ماه ۱۴۰۲، ٹێکانی راه بندگ تیرگواری ٹێلکشانی نێمگا دمگ کله‌گانئے جالکا سئوب بوتگ پنج کس بێران و دو کس ٹپّیگ ببیت.

یکّے چه بێران بوتگێن ٹێلکشانی پجّار “کئوس دین شاهوزهی”، ۳۲ سالگ اِنت. باب دینئے چُکّ،‏ سور کُرتگێنے و سئے چُکّئے پت و شوروئے مردم چه گوهرکۆهئے دمگا و واشئے مردم و دوێن ٹپّیگێن کسانی پجّار “هامد شه بهش” و دگرے گۆن “براهویی” کئومی ناما، هر دوێن دُزآپئے نندۆک گوشگ بوتگ‌اَنت.

چه آ دگه بێران بوتگێن مردمانی پجّارا تان انّون هچ هالے نێست.

گوَشگَ بیت که کئوس دین کار کنۆکێن بندیگان بوتگ که پنج سال پێش مئوادئے جُرما شیرازئے تها آوار جنگ بوتگ و کساس یک سالے پێش گۆن کار کنۆکێن بندیگانی هُکما وتی باپاریا گوازێنگا بوتگ و بێرۆزگاریئے سئوبا لاچار بوتگ که گۆن وتی مُتُرا په ٹێلکشی رۆزگارا بگوازێنیت.

سر بوتگێن هالا ردا، سلاهبندێن ٹێکانی مُتُریانی سرا تیرگواری کُرتگ که کم چه کم پنج کس بێران و دو کس ٹپّیگ بوتگ.

گوَشگ بیت بێران بوتگێن ومردم، مردمان و اے دگه ٹێلکشین مردمانی دستا سرد هانه و شستونئے رازیئے نادراهجاها بَرَگ بوتگ‌اَنت.

انچۆ بازێنے چه شستونئے سیمسرئے رستگێن هالان پێش دارنت لهتێن چه امنیتی و نزامی جُنزان چۆ مرساد، اتلاهاتئے اداره و سپاهئے اداره گۆن سِلّێن مردمانی سلاهبند کنگ و سبزێن چراگئے پێش دارگا، چه آیان لۆٹتگِش که گۆن نا امنیئے جۆڑ کنگ و سلاهبندیێن دُزّیانی گۆما ٹێلکشێن بلۆچانی دێما بگرنت و آیانی کار کنگئے دێمپان ببنت.

گوشگ ببیت که گوَستگێن چُنت ماهئے تها، بازێن هالے چه نامالومێن سلاهبندێن مردمانی تیرشانی،‏ ٹێلکشێن مردم و بارکشێن ماشینانی نێمگا و پٹان کشانی نێمگا شستونئے سیمسرئے سرا رسگا اِنت.