راسکئے تها دو نپرئے ٹپّیگ و کُشگ بئیگ رجیمئے نیمّۆنئے شک و گمانا که جئیش ‌و هدّلئے باسک اَنت

رَسانک نیوز

مرۆچی جمهه ۲۴ آزر ۱۴۰۲، رَند چه جئیش و هدّلئے نیروانی درگیریا و راسکئے انترامی پرماندهئے نزامی نیروان، نزامی نیروان دو جهمنندێن بلۆچئے نێمگا که راسکئے شهرئے خیابانا بوتگ‌اَنت تیرشانی کُرتگ همے سئوبا دو نپر ٹپّیگ و کُشَگ ببنت.

اے دوێن بلۆچانی پجّار “اهمد درکشان” معین الدینئے نامئے سرا ماروپ اِنت، ۲۰ سال اِنت دادکریمئے چُکّ اِنت و ٹپّیگ بوتگێنئے پجّار “امان الّاه چاریزهی” پهرئے مردم و راسکئے نندۆک گوشگ بوتگ.

نزامی سرمستران کارِندهان اے وڑا دوێن بلۆچ ورنا چه جئیش و هدّلئے مردم هساب کُرتگ‌اَنت که اے دوێن کَس رَند چه جئیش و هدّلئے اُرش برگا، پاسگاهئے نێمگا شُتگ و لۆٹتگِش چه جاورئے هالا سهیگ ببنت که چے بوتگ، که سپاهئے نیروان اے دوێن بلۆچانی نێمگا تیرشانی کُرتگ.

گۆن دوێن جتاێن رَندئے سپاهئے تیرشانیان اے جهمندانی نێمگا، اهمد کُشگ بوتگ و امان الّاه رَند چه ٹپّیگ بئگا دزگیر کنگ بوتگ.

هکومتئے رَسانکان گۆن اهمدئے جسدئے شِنگ کنگا گوَشتگِش که آییئے یکّے چه جئیش و هدّلئے مردمان بوتگ که آییئے هلکئے مردم اے هبر رَد کُرتگ و اێلامِش کُرتگ اهمدئے لۆگ راسکئے انتزامی مرکزئے کِرّا بوتگ.

انچۆ امان الّاه راسکئے تها هَجّامیئے کارا دلگۆش بوتگ و چُنت سد متریئے انتزامیئے پاسگاها، بانک ملیئے دێم په دێما تیرشانی کنگ بوتگ.

گوشگی اِنت که اهمدئے جسد انّون راسکئے ولایتئے نادراهجاهئے سردهانئیا اِنت اَمان الّاه رَند چه نزامی نیروانی تیرشانیا دزگیر کنگ و ناملومێن جاهے بَرگ بوتگ.