رَسانک نیوز
یکشمبه ۱۹ آزر ۱۴۰۲، راسکئے شهرئے (ثبت احوالا) چه بلۆچی اسلی نامئے اێر کنگا که یک پت و ماتا لۆٹتگ بلۆچی اسیلێن نامے (بۆهێر: اِزّت والا) په وتی چُکّا اێر بکننت نمنّۆک بوتگ.
اے هالئے رِدا، اے چُکّئے پت و مات چه بازێن جُست گیریان که وتی چُکّئے ناما بۆهیر بکننت بله آیان اے نیمّۆن آورتگ که اے نام مئے سیستمئے تها نێست و چه آییئے نامئے زورگا دوریِش کُرتگ.
ثبت احوالئے ادارهئے پجارئے کاٹئے اَڈ نکنگ گۆن لهتێن گچێنێن بلۆچی نامان چه دێر وهد اِنت که اے کار بئیگا اِنت. ثبت احوالئے ادارهئے نمنّگ چُش اِنت که بازێنے چه چُکان پجارئے کاٹئے نێستیا چۆ بیت کنت که چه واکسنئے گِرَگا و بازێن دگه کاران پشت بکپنت.
گوشگی اِنت ثبت احوالئے اداره گۆن یک کتابے که دئولتئے نێمگا نام دئیگ بوتگاَنت بس کبولِش کنت و آ دگه نامان که اے کتابئے تها نێستاَنت آ نامی گئیر کانونی نامانی تها هسابی کُرتگاَنت.
دێمگیری و سیاسی و مزهبی گِند که اے کتابئے تها اێر کنگ بوتگ بازێنے چه بلۆچێن جهمنندان که لۆٹنٹ وتی دۆد و ربێدگئے درۆشما وتی چُکّانی سرا نام ببندنت مهرومی کُرتگ که اے کار هکوک بشرئے کئول نامهئے نمنّگاِنت.
گوشگ ببیت که دنیائے تپاکێن جُنزئے چُکّانی هکوکئے کئولنامها ائولی بندا هپتمی مادهئے تها آتکگ: چُکّئے پێداگ بئیگ گۆن آییئے پێدایشا لکّگ بیت و بازێن هکّے چۆ نام و هلکئے پجّار و اگن بیت کنت آییئے پت و ماتئے پجّار و آیانی سرپرستیئے چێرا اێر کنگ ببیت.
Be the first to comment