رَسانک نیوز

دوشمبه ۲۲ آبان ۱۴۰۲، سئے سیاسی بلۆچ زندانیئے اێدامی، بگئیر چه آیانی کهۆلانی هال دئیگا اجرا کنگ بوتگ.

اے سئیێن بلۆچێن زندانیانی پجّار “مهمدکریم بارکزایی”، ۲۸ سالگ، رُستمئے چُکّ، سور کُرتگێن و “مهمد براهویی” ۲۸ سالگ، اَلیئے چُکّ، سور کُرتگێن و یک چُکیئے پِت و “ادریس بیلرانی” ۳۱ سالگ، میرزائے چُک، سور کُرتگێن و هر سئیێن دُزآپئے نندۆک گوشگ بوتگ‌اَنت.

گوشگی اِنت اے سئیێن نپر ۱۳۹۹ ئے سالا “افساد فی الارض” و “گۆن دئولتئے هلاپێن گروپانی همکاریئے جرما” دزگیر کنگ و دزآپئے انکلابئے دادجاها، ۱۵ سال زندان و اێدامئے هُکما، مهکوم کنگ بوتگ‌اَنت.

گۆن مالومێن جاگهێئے هبرا، اے هُکم اے وڑا دئیگ بوتگ که اے سئیێن زندانی سکّ‌ترێن اَزابانی تها بوتگ و چه نادریا وتی جُرمئے سرا اکرارِش کُرتگ.

گوشگی اِنت اے باشندهێن بلۆچانی اێدامیئے هُکم کانودئے هلاپئے سرا دئیگ بوتگ و دُزآپئے زندان و دادجاهئے سرمستران بگئیر چه اشانی هَلکئے مردمانی گوَشگا هُکم داتگ و بگئیر چا آسری دیدارا اێدام کنگ بوتگ‌اَنت.