رَسانک نیوز/ شمبے 28 شهریور ماہ 1405 ءِ بانگواہ ءَ، دُزاپ ءِ ھیام 9 ءَ بلوچے سلاہبندیں مردمانی تیرگواری ئے دپ ءَ کپتگ ءُ ساھی داتگ. آییئے مات ءُ لوگ بانوک تیرگواری ئے وھدا گوں آییا ھمراہ بوتگ اَنت، بله چه اے اُرش ءَ رکّتگ اَنت.
رَسانک ءَ اے بلوچئے پجّار «اَلی شهبکش»، کِساس 28 سالگ، سَپَر ئے چُک، بُندر ءَ دومگ ئے نندوک ءُ دُزاپ ءِ جهمنند زانتگ.
رَسانک ءِ ھال سرکنوکانی رِد ءَ، اَلی وتی مات ءُ لوگ بانوک ئے ھمراھیا دزاپ ءِ ھیام روڈ ءَ گوں گاڑی ءَ روگ ءَ بوتگ که چُنت سلاہبندیں مردمان ءَ آیانی گاڑی ئے سرا تیرگواری کرتگ. اے تیرگواری ءَ اَلی ءَ دو تیر ماں سرا وارتگ ءُ ساہ داتگ، بله آییئے مات ءُ لوگ بانوک ءَ نُکس نه بوتگ.
ھال سرکنوکان ءَ گوَشتگ: اے تیرگواری ءَ کشا اُوشتاتگیں ھمسایگئے گاڑی ءَ تیر لگّتگ ءُ نُکس بوتگ، ھمے وڑا کش ءُ کرّیں دیوالاں ھم تیر لگّتگ.
داں انگتا اے تیرگواری ئے بارئوا گیشتریں ھالے دست نه کپتگ ءُ نه که جنوکانی پجّار ءُ آیانی سئوب زانگ بوتگ.
Be the first to comment