رَسانک نیوز/ جمے 27 شهریور ماہ 1405، رَسانک ءَ دزاپ ءَ نزامی ٹولییا گوں سلاہبندیں ٹکّر ءَ کُشگ بوتگیں دو بلوچئے ءُ ٹپّیگ ءُ دزگیر کنگ بوتگیں بلوچئے پجّار درا کرتگ.
رَسانک ءَ کُشگ بوتگیں دو بلوچئے پجّار «زکریا شهبکش»، گلام نبی ئے چُک، «مهرالله شهبکش»، بجّار ئے چُک، ھر دو دزاپ ءِ گلوگاه دمگئے نندوک ءُ ٹپّیگ ءُ دزگیر کنگ بوتگیں بلوچئے پجّار «امید شهبکش»، ازیز ئے چُک، دزاپ ءِ نندوک زانتگ.
رَسانک ءِ ھال سرکنوکانی رِد ءَ، زکریا ءُ مهرالله دزاپ ءِ شهدربرجاہ ئے روڈ ءَ گوں نزامی ٹولییا سلاہبندیں ٹکّر ئے وھدا کُشگ بوتگ اَنت ءُ امید شهبکش اے ٹکّر ءَ ٹپّیگ بوتگ ءُ نزامی ٹولییا دزگیر کرتگ.
پیسر ترا رَسانک ءَ گوشتگ: دزاپ ءَ نزامی ٹولی ءُ پژو 405 گاڑی ئے سلاہبندیں نندوکانی میان ءَ، سلاہبندیں ٹکّر چه بانگواه ءِ ساھت 00:30 ئے وھدا بنگیج بوتگ ءُ تانکه کریب دو ساھت ءَ داشتگ، اے ٹکّر ءَ دو نیمگے تیرگواری بوتگ ءُ چُنت آمبولانس ٹکّر ئے جاگها دیم دیئگ بوتگ.
پارس ھال رَسان که سرکاری ادارھانی ائیردستیں میڈیا اِنت داواھی کرتگ سپاه ءِ زمینی لشکر ئے کُدس ٹولی گشت ئے وھدا دزاپ ءِ شهدربرجاہ روڈ ءَ یک سواری گاڑییے سرا گمان دار بوتگ ءُ رَند چه اشیا آیانی میان ءَ سلاہبندیں ٹکّر بوتگ. اے ھال رَسان ءَ دو بلوچئے کُشگ بوھگ ءُ یک بلوچییے ٹپّیگ ءُ دزگیر بوھگئے ھال سر کرتگ.
Be the first to comment