دُزاپ ءِ بندیگجاہ ءَ بلوچے بندیگے گوں اشیا کہ کوش ئے تُهمت ءَ رَدی کرتگ، پاھو دیئگ بوتگ

رَسانک نیوز/ سئے شمبے 3 شهریور ماہ 1405 ءِ بانگواہ ءَ، دُزاپ ءِ بندیگجاہ ءَ بلوچے بندیگے کہ چار سالا پیش جُست پُرس کنوکیں ادارہ ءَ آییئے لوگئے سرا اُرش ئے وھدا پہ کوشئے بُهتان ءَ دزگیر کرتگ، پاھو دیئگ بوتگ.

رَسانک ءَ اے بلوچئے پجّار «امید (اَلی‌اکبر) شاھوزھی»، نئمت اللّہ ئے چُک، آروس کرتگ ءُ دو زھگئے پت، دُزاپ ءِ نندوک زانتگ.

رَسانک ءِ ھال سرکنوکان ءَ گوَشتگ: آیی چہ دزگیر بوھگئے وھدا اے کوش ئے تُهمت ءَ نہ منّتگ ءُ داواھی اِشی بوتگ کہ کوشی نہ کرتگ. ھمے وڑا آییئے سرا بستگیں بُهتان اَلّما پہ پت نہ بوتگ، بلہ پدا ھم آیی پاھو ئے ھُکم دیئگ ءُ مروچی ھُکمئے سرا کاروایی بوتگ.

اے ھُکمئے سرا ھماں وھدا کاروایی بوتگ کہ ھال سرکنوکانی رِد ءَ، کوش ئے تهمت اے بندیگے سرا اَلّما سابت نہ بوتگ ءُ پرمندھئے دیمرویئے وھدا آییا مُدام وتی بے گناہ بوھگئے سرا زور داتگ؛ اے بُن گپّ ءَ بلوچان ءَ پاھو ئے ھُکمئے دیئگ ءُ اے ھُکمانی سرا کاروایی ءُ پرمندھانی دیمرویئے جاورانی بارئوا دل پریشانی گیش کرتگ.