رَسانک نیوز/ دوشمبے 26 مرداد ماہ 1405، زرآباد ئے ھمتآباد دمگ ءَ میرانزھی ءُ گاجیزھی کبیلهانی میان ءَ پد چہ چُنت سال جیڑہ ءُ ٹکّر ءَ گوں دینی زانتکاراں، اسپیت ریش ءُ بابهروسهیں مردمانی ھوری ءَ رازی نامہ ءُ سلاھکاریئے دیوانی برجم دارگ بوتگ.
رَسانک ءِ ھال سرکنوکانی رِد ءَ، اے دیوان پہ دویں کبیلهانی میان ءَ جیڑہ ءُ جنجالانی سِندگ ءُ آیانی میان ءَ رازی نامہ ءُ سلاھکاری کنگ ءَ برجم دارگ بوتگ. اے دیوان ءَ دینی زانتکاران ءُ کماش ءُ بابهروسهیں مردمان ءَ چہ دویں کبیلهان ءَ لوٹتگ کہ دیمترا چہ ٹکّر ءُ جنجالاں پهریز بکننت ءُ یکّ ءَ دگر ئے ایمنیئے ھئیالداری ءَ بکننت.
دیوان ءَ نندوکیں مردمان ءَ پہ جیڑھانی سِندگ ءَ کماش ءُ اسپیت ریشانی میانجی گری ءُ دود ءُ رُبیدگی رھبندانی کارمرز کنگ ءَ زور داتگ. ھمے وڑا آیان ءَ چہ دو نیمگئے مردمان ءَ لوٹتگ چہ ھر اے وڑیں کاروایی ءُ گامگیجی کہ آیانی میان ءَ جیڑہ ءُ جنجالان ءَ چِست بکنت پهریز بکننت.
Be the first to comment