زابل ءِ سیمسراں چاروگیں نزامی باسکئے نزامی کارمندی پد چہ سئے ھپتگ ءَ کہ سلاہ بندیں مردمان ءَ آوار جتگ، کُشگ بوتگ

رَسانک نیوز/ پنچشمبے 1 مرداد ماہ 1405، زابلئے سیمسراں چاروگیں نزامی باسکئے کارمندی کہ پنچشمبے 11 تیر ماہ ءِ روچ ءَ سلاہ بندیں مردمان ءَ چہ زابلئے مهمدآباد دمگ ءَ آوار جتگ ءُ آییئے ھالے سرپد ئے نہ بوتگ، ساھی داتگ.

اے نزامی کارمند ئے پجّار سروان «سیدمهدی ابدلهی»، 51 سالگ، ابدلکریم ئے چُک، بُندر ءَ کهگیلویہ ءُ بویر اھمد سوبهئے گچساران شهر ئے نندوک ءُ زابلئے جهمنند زانگ بوتگ۔ زابل ءِ سیمسراں چاروگیں زرباریں رستم کلات پاسگاھئے کارمند بوتگ.

اے ھالئے رِد ءَ، ھماں وھدا کہ سروان ابدلهی زابل ءِ مهمدآباد ئے سنئتی شهرک ءَ وتی کار ئے جاھا روگ ءَ بوتگ کہ سلاہ بندین ءُ بے پجّاریں مردمان ءَ آوار جتگ ءُ ھچ کس ءُ ھچ گلی آییئے آوار جنگئے زمّهواری نہ منّتگ۔ سروان ابدلهی آروس کرتگ، دو زھگئے پت، آییئے ھزمت ءِ آسر بوھگ ءَ بس دو ماہ پَشت کپتگ.

داں انگتا ایران ئے ھچ امنیتی ءُ نزامی ادارھیا آییئے آوار جنگ ءُ کُشگ بوھگئے بارئوا روژنیں ھالی شِنگ نہ کرتگ.