رَسانک نیوز/ سئے شمبے 16 تیر ماہ 1405، شستون ءَ امنیتی ٹولییے ٹکّر ءَ کُشگ بوتگیں چار بلوچ ءَ یکییے بے ساھیں جون 30 روچ ءَ پد لوگئے مردمانی دست ءَ دئیگ بوتگ۔ بلے آ دگہ سئے مردمئے بے ساھیں جون داں انگتا امنیتی ادارھانی کرّا اِنت.
اے بلوچئے پجّار «یاسین مهمدزھی»، شریپ ئے چُک، تپتان ئے نازیل زِلّهئے چاہ اھمد دمگئے نندوک زانگ بوتگ۔ آییئے بے ساھیں جون یک ماہ رَندگیری ءَ پد زی سباھا لوگئے مردمانی دست ءَ دئیگ بوتگ.
گوَشگ لوٹیت آں دگہ سئے بلوچئے بے ساھیں جون گوں اے پجّاراں «جلیل نهتانی»، کِساس 45 سالگ، ھمید ئے چُک، چہ زانگ بوتگیں چَپّیں مردماں، «مهمداُمر نهتانی»، کِساس 24 سالگ، جلیل ئے چُک، ھر دو دُزاپ ءِ نندوک ءُ «وھید شاھوزھی»، ابداللّہ ئے چُک، دُزاپ ءِ نندوک، داں انگتا آیانی لوگئے مردمانی دست ءَ دئیگ نہ بوتگ.
اے چاریں بلوچ یکشمبے روچ 17 ھُرداد ماہ شستون ءَ امنیتی ٹولی ءَ گوں ٹکّر ئے وھدا کُشگ بوتگ اَنت۔ آ دگہ سئے بلوچئے ھاندان ءُ کهول ءَ پہ بے ساھیں جون ئے دست گِرَگ ءَ باز رَندگیری کرتگ، بلے داں انگت ءَ آیانی لاش وارسانی دست ءَ دئیگ نہ بوتگ اَنت۔ بید چہ ھاندان ءُ لوگئے مردمان ءَ، دمگئے با بهروسهین ءُ اسپیت ریشیں مردماں ھم پہ لاشانی دست ءَ گِرَگ ءَ وتی جُهد کرتگ بلے داں انگت ءَ امنیتی ادارھان ءَ لاش آیانی دست ءَ نہ داتگ ءُ نہ کہ گوَشتگش چی وھدا دست ءَ دئیگ بنت.
Be the first to comment